د فرانسې د وکیلانو ټولنې په یوې خبر پاڼه کې د دغه هېواد د چارواکو په هغه پرېکړه چې د افغان خبریالانو د ویزو غوښتنې یې رد کړې، سختې اندیښنې او غوسه راپارولې ده.
دغې ټولنې د فرانسې له لوري په پاکستان او ایران کې د مېشتو افغان خبریالانو د ویزو د غوښتنې په غبرګون کې د دغه هېواد یوې اداري محکمې ته عریضه کړې ده.
یادې ټولنې ویلي، د جمهوري نظام تر پرځیدو وروسته افغان خبریالان او د مدني ټولنو فعالان د بیان ازادۍ د ملاتړ له امله د طالبانو له لوري هدف ګرځیدلي دي.
په خبرپاڼه کې راغلي چې ګڼ شمېر افغان خبریالان د طالبانو له ویرې د ځانونو او کورنیو د خوندیتوب په موخه ګاونډیو هېوادونو ایران او پاکستان ته تللي چې هلته د بیا مېشتیدو لپاره هېڅ ډول روښانه راتلونکی نه لري.
د فرانسې د وکیلانو ټولنه په دې باور ده چې په یادو ګاونډیو هېوادونو کې افغان خبریالان د نیول کیدو، افغانستان ته په زور د ستنیدو او د کډوالو خلاف د دغو ګاونډیو هېوادونو د سختو قوانینو له امله له تاوتریخوالي سره مخ دي.
د دغې ټولنې د خبرپاڼې له مخې فرانسه چې تل یې د بشري حقونو او د رسنیو د ازادۍ ادعا کړې له ګواښ سره د مخ افغان خبریالانو ویزو په ردولو سره یې د انساني حقونو اړوند خپل بنسټیز اصولو تر پوښتنې لاندې راوستي دي.
د فرانسې د وکیلانو ټولنې خبر داری ورکړی چې د قانوني اقداماتو په موخه د ویزو د ردیدو اړوند محکمو ته عریضې وړاندې کړي، چې د دغو غیر انساني پرېکړو مخه ونیسي. دغې ټولنې ویلي چې د محکمې له لارې غواړي چې پر فرانسوي چارواکو فشار راوړي، چې خپلو اخلاقي او قانوني ژمنو ته درناوی وکړي.
ټاکل شوې ده چې یوه مهمه محکمه د ۲۰۲۵ کال د جنورۍ په ۲۸مه نېټه د نانت ښار په اداري محکمه کې ترسره شي.
په دغې ناسته کې به د ویزې د رد د پرېکړو د ځنډیدو غوښتنې ارزول کېږي. د فرانسې د وکیلانو ټولنه هیله لري چې محکمه به دا پرېکړې لغوه کړي او د بنسټیزو حقونو درناوی به تایید کړي.
د فرانسې د وکیلانو ټولنې په دغه خپرې کړې اعلامیه کې له خپل حکومته درې غوښتنې کړي دي:
۱« له ګواښ سره مخ افغان خبریالانو ته دې سمدستي ویزې ورکړل شي، چې هغوی وکولای شي فرانسې ته لاړ شي او هلته خوندي ژوند وکړي»
۲ « د قونسلګریو د پرېکړو په بهیر کې دې روڼتیا رامنځته شي، د قضیو لاسرسی دې تضمین شي او د پناه غوښتنې لپاره یوه عادلانه او چټکه پروسه دې یقیني شي».
۳ «د بشري حقونو او د رسنیو د ازادۍ ملاتړ لپاره دې یو تل پاتې نړیوال سیاست ډیزاین او پلی شي.»
یادې ټولنې زیاته کړې په ایران او پاکستان کې له ګواښ سره مخ افغان خبریالان هره شېبه د پولیسو له لوري د نیول کیدو او افغانستان ته د ستنیدو له ګواښ سره مخ دي چې دا حالت یې په مرګ تمامیدلی شي.
د فرانسې د وکیلانو ټولنې خبرداری ورکړی چې د افغان خبریالانو پر وړاندې د بې پروایې دوام به د فرانسې نړیوال اعتبار زیانمن کړي او د سلګونو خبریالانو ژوند به هم له ګواښ سره مخ کړي.
په تېرو دوه اونیو کې په پاکستان کې هم د افغان کډوالو نیول کیدو پسې پولیسو کور په کور عملیات پیل کړي چې په ترڅ کې یې له ۱۰۰۰تنو څخه ډېر افغانان ونیول شول چې په کې یو شمېر افغان خبریالان او دهغوی کورنۍ هم شاملې وې.
اوس مهال په اسلام اباد او تهران کې لسګونه خبریالان له هېواده جلا وطنه دي او لوېدیځو هېوادونو کې د پناه غوښتنې قضیو ته په تمه دي.