د طالبانو د بهرنیو چارو وزیر امیرخان متقي د (مرغومې ۲۷ مه) د ملګرو ملتونو ادارو سره د همغږۍ په غونډه کې ویلي چې بشري مرستې باید له سیاست څخه لرې وساتل شي او که داسې ونه شي؛ نو د مرستو لړۍ به ټپه ودرېږي.
د ملګرو ملتونو د بېلابېلو ادارو او طالبانو ترمنځ د همغږۍ په غونډه کې طالبانو ټینګار کړی چې سیاسي مسایل او بشري مرستې دې سره جلا شي، چې د مرستو پر بهیر منفي اغیزې له منځه ولاړې شي.
د طالبانو د بهرنیو چارو وزیر په یاده ناسته کې اندېښنه ښوولې چې افغانستان کې د اقلیمي بدلون په برخه کې لازمه پاملرنه نه ده شوې او دغه هېواد د اقلیم په بدلون کې هېڅ ډول منفي رول نه لري. هغه وایي، هغه هېوادونه چې له امله یې افغانستان د اقلیمي بدلون په برخه کې اغیزمن شوی باید مرستې ته راوړاندې شي.
متقي د هغو هېوادونو چې له امله یې د افغانستان اقلیم له ستونزو سره مخ کړی نومونه وانه خیستل.
په کابل کې د ملګرو ملتونو د سیاسي استازولۍ «یوناما» مرستیال اندریکا راتوت په دغه ناسته کې طالبانو ته ډاډ ورکړی چې له افغانستان سره به په یادو شویو برخو کې کار کوي. هغه ویلي چې په تېر ۲۰۲۴ زېږدیز کال کې یې په افغانستان کې پر بشري مرستو ۱.۳ میلونه ډالر لګولي وو.
هغه زیاته کړې چې په افغانستان کې اوس مهال شاوخوا ۲۲ میلونه وګړي انساني مرستو ته اړتیا لري.
دا څرګندونې داسې مهال کیږي چې د طالبانو په واکمنیدو سره په هېواد کې تر بل هر وخته لوږه او بې کاري ډېره شوې چې له امله یې خلک له ستوتزو سره مخ شوي دي. د طالبانو په واکمنۍ کې پر زده کړو او ښځو د سختو بندیزونو له کبله ډېری مرستندویه ادارو خپل دفترونه تړلي او بشري مرستې هم تر بل هر وخت را کمې شوي دي.
نیوکې دا دي چې طالبانو په لوی لاس په افغانستان کې د بشري مرستندویه ادارو مخه نیولې، د دندو فرصتونه یې کم کړي او د خپلو بندیزونو له امله یې په هېواد کې د بې کارۍ کچه لوړه کړې چې له همدې امله په هېواد کې لوږه لوړې کچې ته رسیدلې ده.
بل لوري نیوکې دا دي چې د طالبانو له لوري اوس مهال پر کیدونکو بشري مرستو هم محدودیتونه لګیدلي او په بېلابېلو سیمو کې د طالبانو کورنۍ او د دوی خپلوان د اړمنو خلکو پر ځای له دغو مرستو برخمن کېږي.