پاکستاني رسنۍ خراسان ډایري د چهارشنبې په ورځ په پاکستان کې د امریکا ماموریت له لوري په خپاره شوي خبرداري کې لیکلي چې د نومبر له ۲۷مې د ډیسمبر تر ۱۶مې دې د امنیتي ګواښ له امله د پېښور له سرینا هوټل او شاوخوا سیمو لرې پاتې شي.

په دغه خبرداري کې لیکل شوي چې ټول امریکايي وګړي چې په سرینا هوټل او شاوخوا سیمو کې اوسیږي ژر تر ژره دې دغه سیمه پریږدي او له دغه امنیتي ګواښ دې ځان وساتي.
په یاد خبرداري کې دا نه دي ویل شوي، چې امنیتي ګواښ څه ډول او د کومې ډلې له لوري موجود دی خو یوازې یې امریکايي وګړي دغې سیمې ته له ورتلو او اوسیدو منعه کړي دي.
پاکستان کې د امریکا ماموریت په خبرداري کې له امریکايي وګړو غوښتل شوي چې په دې موده کې خپل امنیتي پلان بدل کړي، ځانونه عادي وښيي، د تازه معلوماتو لپاره ځايي رسنۍ وڅاري او د پاکستان په اړه د امریکا امنیتي راپور وڅاري.
دا په داسې حال کې ده چې په پاکستان کې امنیتي حالت ورځ تر بلې ترینګلی کیږي او ورسره سیاسي ناکرارۍ په ډیرېدو دي.
د پاکستان د بلوچستان او خیبرپښتونخوا ایالتونه د ناامنۍ او سیاسي ناکراریو له امله ورځ تر بلې د ناامنۍ لور ته روان دي او په کې سیاسي او اقتصادي بې ثباتي په زیاتېدو ده.
دا لومړی ځل نه دی چې په پاکستان کې د امریکا ماموریت خپلو وګړو ته د امنیتي ګواښ له امله د ځان خوندینې په اړه سپارښتنې کوي، تر دې وړاندې هم په اسلام اباد، پېښور او د دغه هیواد په ځینو سیمو کې د امنیتي ګواښ له امله امریکايي وګړو ته د نه ګرځېدو او اوسیدو سپارښتنې شوې وې.