په پنجشیر کې د طالبانو د کانونو او پټرولیم ریاست وايي، د روان کال په لومړیو شپږو میاشتو کې یې په ۱۱ پړاونو کې ۳۵ زره او ۸۷۴ قیراطه زمرد د یو میلیون او ۶۱۴ زره ډالرو په ارزښت پلورلي دي.
په پنجشیر کې د طالبانو د اطلاعات او کلتور ریاست د یکشنبې په ورځ د (تلې ۲۹مه) په اېکس پاڼه د دغه ولایت د کانونو او پټرولیم د مشر محمد قاسم امیري له قوله لیکلي، چې د پلورل شویو زمردو له لیلام څخه یې ۱۶۱۴۰۰ ډالره ګټه د طالبانو خزاني ته ورکړي ده.
محمد قاسم امیري وايي، چې په پنجشیر کې یې ۵۹۰ تنو ته د زمردو د کانونو کېندلو جواز ورکړی او دمګړۍ په دغه ولایت کې د زمردو ۳۰۰ کانونه فعال دي.
طالبانو واک ته له رسیدو سره سم په افغانستان کې، د تېلو، ګاز، ډبرو سکرو او قیمتي ډبرو د کانونو اېستلو ته ډیره پاملرنه کړې ده.
دغې ډلې په تېرو درېیو کلونو کې د افغانستان د بېلابېلو کانې زیرمو اېستلو قرادادونه د چین او یو شمېر نورو هېوادونو په ګډون کورنیو شرکتونه ته هم ورکړي دي.
په دغېډله تور دی، چې د افغانستان د کانې زیرمو په ایستلو کې پراخ فساد کوي او کانونه هم په نا معیاري ډول سپړي.
دا په داسې حال کې ده، چې څه موده وړاندې طالبانو د کانونو او پټرولیم وزیر شهاب الدین دلاور د فساد په تور له دندې ګوښه کړ.