د اسراییل پوځ د پنجشنبې په ورځ د لبنان په سویل کې د ۲۰ ښارونو له اوسېدونکو وغوښتل چې سمدستي خپل کورونه پرېږدي.
سره له دې چې اسراییل د حزب الله ډلې ته درانه زیانونه اړولي او د دغې ډلې د مشر په ګډون یې څو لوړپوړی چارواکي وروژلي؛ خو لا هم په دغه ډلې خپلو فشارونو ته دوام ورکوي.
د سویلي ښارونو څخه د خلکو د وتلو په غوښتنه کې د ولایتي پلازمینه نباتیه هم شامله ده، چېرې چې ویل کیږي اسراییل به د حزب الله د لا کمزوري کولو لپاره پوځي عملیات ترسره کړي.
اسراییل، چې له شاوخوا یو کال راهیسې په غزه کې له حماس سره په جګړه بوخت دی، د دوه اونیو له سختو هوايي بریدونو وروسته خپل پوځیان سویلي لبنان ته لیږلي دي.
دغه جګړه، د امریکا او ایران ترمنځ د جګړې خطر زیاتوي.
د بیروت په سویلي څنډه کې چې د حزب الله مرکز دی، د پنجشنبې په ورځ د درېیو چاودنو غږونه اوریدل شوي او د اسراییلي بریدونو لاندې راغلو سیمو څخه لوګي پورته کیږي.
حزب الله ویلي دي، چې د لبنان په سویل کې د اسرایلي ځواکونو په وړاندې یې ځای پرځای شوي چاودیدونکو توکو ته چاودنه ورکړې ده.
د لبنان د روغتیا وزارت ویلي، چې تېره شپه اسراییلو په مرکز بیروت کې بمباري کړې او نهه تنه یې وژلي دي.
رویټرز خبري آژانس د عیني شاهدانو له قوله د یوې زورورې چاودنې د اوریدلو خبر ورکړی، چې یوې امنیتي سرچینې ویلي، له پارلمان څخه څو سوه متره لیرې د باچورا په ولسوالۍ کې یې یوه ودانۍ په نښه کړې.
په لبنان کې د ملګرو ملتونو ځانګړي همغږي کوونکې جینین هینس پلاسچارت په دې اړه وویل: "په بیروت کې یوه بله له چاودنو سره ملګرې شپه. پر له پسې چاودنو دغه ښار ولړزاوه. د خطر زنګونه. نه پوهیدم چې څه به وي. یوازې ناڅرګندتیا په مخ کې ده. اندېښنه او ویره هره خوا ته خوره ده."
په حزب الله پورې تړلې یوې ملکي دفاع ډلې ویلي، چې د بیروت په برید کې د دوو ډاکټرانو په ګډون د دوی اووه کارکوونکي وژل شوي.
اسراییل دا هم ویلي، چې د لبنان په سویلي ښار بنت جبیل کې یې د ښاروالۍ ودانۍ په نښه کړې چې د حزب الله ۱۵ غړي یې وژلي، په داسې حال کې چې تر سلو زیات اسراییلي توغندي د دحیه په سویلي ښارګوټي هم لګېدلي، چیرې چې تېره اونۍ د حزب الله مشر حسن نصرالله ووژل شو.
د لبنان په سویل کې د چهارشنبه په ورځ اته اسراییلي سرتېري په ځمکني جګړه کې ووژل شول. دا مرګژوبله هغه مهال رامنځته شوه چې د دوی ځواکونه شمالي سیمو ته ننوتل.