د پښتنو ژغورنې غورځنګ مشر منظور پښتین وايي، چې ګیله من وزیر د استعماري جابر ریاست د ظلم پر خلاف او د خپلواکۍ په مبارزه کې "شهادت" قبول کړ خو سر یې ټیټ نه کړ.
نوموړی وروسته له دې، چې نن د شپې ناوخته یې د ګیله من وزیر د مړینې خبر خپور کړ، پر خپلې اېکس پاڼې لیکلی، چې هغه یې په ژوند کې نېږدې او وفادار ملګری و.
پښتین زیاته کړې: " هغه زما په ژوند کې تر ټولو ما ته نږدې، خوږ او وفادار ملګری، یو پیاوړی ننګیالی د خپلواکې او افغانیت مبارز و".
نوموړي ګیله من وزیر د افغانانو او پښتنو د رښتوني ترجمان په توګه یاد کړی او ویلي یې دي، چې هغه په خپلې مبارزې کې صادق او زړور و.
د پښتون ژغورنې غورځنګ غړی او شاعر ګیله من وزیر درې ورځې وړاندې په اسلام اباد کې د پاکستان تحریک انصاف ګوند د یوه غړي له خوا پر سر ووهل شو او نن د شپې ناوخته په روغتون کې مړ شو.