په کابل کې د پاکستان پخوانی سفیر منصور احمد خان وایي، چې د طالبانو تر واک لاندې افغانستان سره د اسلام اباد اړیکې دومره خړې شوې چې باور یې نه شي کېدای.
منصور احمد خان ویلي، چې له افغانستانه د ناټو او امریکايي ځواکونو تر وتو وروسته د پاکستان او افغانستان اړیکې تر بل هر وخت زیاتې خړې پړې شوې دي.
د پاکستان پخواني سفیر په هغه مقاله کې چې پرون دوشنبې (د غبرګولي په ۲۸مه۹ د عرب نیوز په خبري پاڼه خپره شوه لیکلي، پاکستان چې له کلونو راهیسې یې له طالبانو ملاتړ کړی، اوس یې د دغې ډلې سره اړیکې د دښمنۍ تر پولې رسېدلې. خو تر څنګ یې هغو هېوادونو چې په تېرو دوو لسیزو کې یې له طالبانو سره دښمني پاللې، اوس یې له دغې ډلې سره اړیکې پیاوړې شوې او د غوړېدو په حال کې هم دي.
منصور احمد خان لیکلي:«تر ټولو مهم ټکی دا دی، چې د طالبانو تر واک لاندې افغانستان سره د پاکستان اړیکې د تصور خلاف ترینګلې شوې؛ خو بله غاړه هغه هېوادونه چې په تېرو دوه لسیزو کې یې د دغې ډلې سره مخالفت لاره د هغوی اړیکې ورسره پراخې شوې او د غوړېدا په حال کې دي.»
دغه پاکستاني ډیپلوماټ د طالبانو وروستي سفرونه او د دوحې په درېیمه ناسته کې د دغې ډلې د برخې اخیستو په برخه کې له نړۍوالو سره د دغې ډلې د اړیکو عادي کېدل یاد کړي او لیکلي یې دي:«دا روښانه خبره ده، چې د افغانستان د طالبانو او نړۍوالو تر منځ د اړیکو د عادي کېدو چاره روانه ده.»
هغه وايي، چې روسیه هم دا مهال له ترهکریزې ډلې د طالب مشرانو د نومونو په لرې کولو غور کوي.
د دغه پخواني پاکستاني ډیپلوماټ په خبره، اسلام اباد باید د ترهګرۍ ضد یو جدي سیاسټ خپل کړي او په افغانستان کې هم له طالبانو سره پراخه تعامل ته لاره هواره کړي.
د افغان طالبانو او پاکستان حکومت تر منځ، د تاوتریخوالي اصلي سرچینه په افغانستان کې د ټيټيپي د وسلهوالې ډلې فعالیتونه دي، چې پاکستانی لوری وایي دغه ډله له افغانستانه د دوی پر امنیتي ځواکونو بریدونه کوي.