د پاکستان د دولتي راډیو د خبر له مخې؛ تر دې دمه له۴ لکه او ۴۹ زرو څخه زیات افغان کډوال له پاکستانه افغانستان ته ستانه شوي دي.
دغې رسنۍ د چهار شنبې په ورځ (د مرغومي په ۶مه) د پاکستاني چارواکو په حواله لیکلي، تېره ورځ له پاکستانه یو زرو ۷۵ تنه افغان کډوال افغانستان ته راستانه شوي دي.
دغه رسنۍ ریاتوي، چې خپلو هېواد ته د افغان اتباعو او نورو بې اسنادو اوسېدونکو د اېستلو لړۍ دوام لري.
د دغو کډوالو د موقتي استوګنځايونو لپاره هم تیاری نیول شوی دی او لومړني اړین وسایل هم ورته برابر شوي دي.
دغې رسنۍ د سې شنبې په ورځ (د مرغومي په ۵مه) د پاکستاني چارواکو په حواله لیکلي وو، چې په تېرو دوه ورځو کې له پاکستانه ۲ زره او ۵۷۳ تنه افغان کډوال افغانستان ته راستانه شوي دي.
اسلام اباد ویلي، چې له اقتصادي او امنیتي کړکېچونو سره لاس او ګریوان دی او نه شي کولی د هغو ۶۰۰ زرو کډوالو کوربه توب وکړي، چې د طالبانو له واکمنۍ وروسته دغه هېواد ته راغلي دي.
طالبان چې له پاکستانه په ډله ییزه توګه د کډوالو له اېستلو سره مخالف دي؛ وايي دوی د هغو کسانو ملاتړ کوي چې هېواد ته راستنیږي.