د چین د بهرنیو چارو وزارت ویاندې ماو نینګ، د افغانستان په شمال کې د داعش له خوا د یوه چینایي وګړي د وژل کېدو په غبرګون کې د دغه برید په اړه له طالبانو د څېړنو غوښتنه کړې او ویلي یې دي چې د یاد برید عاملینو ته باید سزا ورکړل شي.
د چین د بهرنیو چارو وزارت ویاندې په یوه بیان کې ویلي، چینايي لوري سمدستي خپل اعتراضونه افغان لوري ته سپارلي او د پېښې د بشپړې څېړنې او عاملینو ته یې د سزا ورکولو غوښتنه کړې ده.
هغې زیاته کړه: «چین د دغه برید له امله ژور زیانمن شوی او غندي یې. موږ د دې پېښې د قربانیانو کورنیو ته د تسلیت مراتب وړاندې کوو.»
دا پېښه د تېرې سې شنبې په ورځ د افغانستان په شمال تخار ولایت کې رامنځ ته شوې وه. د سیمه ییزو چارواکو په وینا، دغه چینايي تبعه پلان درلود چې د چینايي دفتر د مسولینو او د طالبانو له امنیتي چارواکو سره له همغږۍ پرته له خپل ژباړن سره یو نامعلوم ځای ته ولاړ شي چې له یادې پېښې سره مخ شو.
داعش ترهګرې ډلې د یوې اعلامیې په خپرولو سره د دغې وژنې مسوولیت په غاړه اخیستی دی.
دا دویم برید دی چې د داعش خراسان څانګه یې د طالبانو د رژیم پر مهال پر چینايي اتباعو ترسره کوي.
د ۱۴۰۱ کال د ډسمبر په میاشت کې داعش په کابل کې د چینایانو پر مېلمستون برید وکړ چې په پایله کې یې پنځه تنه ټپیان شول. له دغه پېښې وروسته د چین د بهرنیو چارو وزارت له خپلو اتباعو وغوښتل چې ژر تر ژره له افغانستان څخه ووځي.