د طالبانو دفاع وزارت د یوې خبرپاڼې په خپرولو سره وايي، چې مولوي یعقوب مجاهد په کابل کې د سعودي عربستان له سفیر سره په لیدنه کې د دوه اړخیزو اړیکو، بشري، اقتصادي او سیاسي همکاریو په اړه خبرې کړې دي.
د طالبانو د دفاع وزارت وايي، د چهار شنبې په ورځ د دې ډلې دفاع وزیر مولوي محمد یعقوب مجاهد په کابل کې د سعودي عربستان له سفیر فیصل طلق البقمي سره لیدلي دي.
په خبرپاڼه کې ویل شوي، چې یعقوب مجاهد په افغانستان کې د سعودي عربستان د سفارت بیا پرانېستل مهم بللي او د دواړو هېوادونو اړیکې یې له عقیدتي او فرهنګي اړخه شریکې بللې دي.
د طالبانو دفاع وزارت په افغانستان کې د سعودي عربستان د سفیر له قوله لیکلي، چې نوموړي په دې لیدنه کې له افغانستان سره د دوه اړخیزو اړیکو او بشري، اقتصادي او سیاسي همکاریو د پراختیا په برخه کې د ریاض پر ژمنیتا ټینګار کړی دی.
د طالبانو د دفاع وزیر او د افغانستان لپاره د سعودي عربستان سفیر په داسې حال کې ویني، چې د دې ډلې د کورنیو چارو وزیر سراج الدین حقاني او د استخباراتو رییس عبدالحق وثیق تېره ورځ متحده عربي اماراتو ته د سفر پر مهال د دغه هېواد له مشر محمد بن زاید ال نهیان سره لیدلي.