د طالبانو سترې محکمې په یوه خبرپاڼه کې ویلي، چې د کاپیسا ولایت په اله سای ولسوالۍ کې یې د دریو ښځو په ګډون پنځه کسان «له کوره د تیښتې، نامشروع اړیکو او زنا» په تور د خلکو د سترګو پر وړاندې په دُرو وهلي دي.
په خبرپاڼه کې ویل شوي، چې تېره ورځ ددې ډلې د سترې محکمې له تایید وروسته د کاپیسا ولایت په اله سای ولسوالۍ کې دوه ښځې او یو نارینه «له کور څخه د تیښتې او نامشروع اړیکو» په جرم او یوه ښځه او یو نارینه د زنا په تور مجازات شوي دي.
طالبانو د یادو کسانو د هویت په اړه څه نه دي ویلي، خو وايي، دوه تورن کسان یې ۳۹ـ۳۹ دُرې وهلي او په ۱-۱ کال تنفیذي بند سزا یې محکوم کړي دي. دغه راز دوه نور کسان ۲۰-۲۰ دُرې وهل شوي او ۱-۱ کال تنفیذې بند سزا ورته اورول شوې ده. د خبرپاڼې له مخې، یو مجرم ۸ دُرې وهل شوی او په شپږ میاشتې تنفیذي بند محکوم شوی دی.
طالبان وايي، یادو کسانو ته د سزا ورکولو پر مهال د کاپیسا ولایت د ځايي طالب چارواکو ترڅنګ عامو خلکو هم حضور درلود.