کرملین د جو بایډن د وروستۍ پرېکړې په اړه چې کییف ته یې د روسیې په خاوره کې د لرې واټن ویشتونکو توغندیو د کارولو اجازه ورکړې ویلي، چې جو بایډن د اوکراین جګړه پراخوي.
کرملین ویلي، چې د امریکا د دې پرېکړې په اړه به غبرګون وښيي.

کرملین پر بایډن تور لګولی چې د اوکراین جګړې ته پکی وهي او د هغه وروستۍ پریکړې ته د ځواب ورکولو ژمنه یې کړې ده.
دا په داسې حال کې ده، چې د امریکا ولسمشر جو بایډن تېره ورځ وویل، چې اوکراین په روسیه کې د دوی له خوا د ورکړل شویو لرې واټن ویشتونکو توغنديو د کارولو اجازه لري.
بایډن دغه پرېکړه په داسې حال کې کوي، چې نوموړی د اوکراین د ملاتړ په اړه د امریکا د راتلونکې ادارې په تګلاره شک لري.
کییف له اوږدې مودې راهیسې هڅه کوله، چې د متحده ایالاتو له خوا د لرې واټن ویشتونکو توغندیو د کارولو اجازه ترلاسه کړي، ترڅو د روسیې پوځي اهداف په نښه کړي.
د راپورونو له مخې، د بایډن دغه پرېکړه د دواړو هېوادونو ترمنځ کړکېچ نور هم زیاتوي او نړۍواله ټولنه بیا دې وضعیت ته اندېښنه لري.
تر دې وړاندې بیا ویل شوي و، چې ډونالډ ټرمپ غواړي د اوکراین او روسیې جګړه ژر ختمه کړي.
د اوکراین ولسمشر په روسیه کې د شمالي کوریا د ځواکونو له مېشتېدو وروسته په جدي توګه وغوښتل، چې د دغه هېواد لوېدیځ متحدین باید کییف ته اجازه ورکړي، چې د روسیې په خاوره کې د شمالي کوریا ځواکونه په نښه کړي.
روسیې تر دې وړاندې هم د امریکا په ګډون د اوکراین ملاتړو هېوادونو ته ګواښ کړی و، چې که اوکراین ته اجازه ورکړي چې په روسیه د اوږد واټن ویشتونکو توغندیو پر مټ برید وکړي، له ناوړه پایلو سره به مخ شي.