اوکرایني چارواکي وايي، چې روسیې د پنجشنبې په ورځ په دنیپرو ښار یو برید کې د لویو وچو ترمنځ کاریدونکی بالستیک توغندی کارولی دی. دا لومړی ځل دی چې روسیه پر اوکراین دغه ډول توغندی کاروي، چې په اصل کې د لرې واټن اټمي بریدونو لپاره ډیزاین شوی دی.
لویدیځو چارواکو، چې د نوم د نه ښودلو په شرط یې رویټرز سره خبرې کولې، وايي، چې د دوی لومړنیو ارزونو ښودلې چې دغه توغندی د لویو وچو ترمنځ کاریدونکی بالستیک توغندی نه و، خو زیاته کړې یې ده چې ښايي دغه ارزونه وروسته بدله شي.
دغه وروستي برید په ۳۳ میاشتنۍ جګړه کې په چټکۍ سره مخ په زیاتیدونکي کړکیچ په ګوته کوي.
اوکراین په دې اونۍ کې په روسیې کې دننه ځینو موخو باندې د متحده ایالاتو او بریتانیا له خوا ورکړل شوي د لرې واټن ویشتونکي توغندي د روسیې د خبرداري سربیره وکارول. روسیې ویلي و، چې دا کار د لوی تاوتریخوالي په توګه وګوري.
امنیتي کارپوهان وايي، که د پنجشنبې په برید کې د لویو وچو ترمنځ د برید لپاره جوړ شوی یو اوږد واټن ویشتونکی توغندی کارول شوی وي، دا به په جګړه کې د دغه ډول توغندي لومړۍ کارونه وي. دا وسلې ستراتیژیکې وسلې دي چې د اټومي وسلو د لیږد لپاره کارول کیږي.
د اوکراین ولسمشر ولادیمیر زېلېنسکي په یو ویډیویي اعلامیه کې وویل: "نن یو نوی روسي توغندی پر مونږ وتوغول شو. ټولې ځانګړتیاوې یې - سرعت، لوړوالی - د لویو وچو ترمنځ کاریدونکو بالستیک توغنديو دی. اوس یو متخصص په دې اړه د څیړنو په حال کې دي."
د اوکراین د بهرنیو چارو وزارت له نړیوالې ټولنې غوښتي چې د روسیې له خوا د نوي ډول وسلې د کارولو په اړه دې ژر تر ژره غبرګون وښيي.
د اوکراین هوايي ځواک ویلي، چې دا توغندی د اوکراین په دنیپرو څخه ۷۰۰ کیلومتره لرې د روسیې له استراخان سیمې څخه توغول شوی دی.