د طالبانو تر واک لاندې باختر دولتي اژانس د خبر له مخې په هلمند پوهنتون کې نن د دې ډلې چارواکو "د شریعت له نظره ځان وژنه او عواقب يې" تر سرلیک لاندې سمینار جوړ کړ.
د طالبانو تر واک لاندې باختر اژانس د خبر له مخې نن د سې شنبې «د لړم۱۵مه» د هلمند پوهنتون د غونډو په تالار کي د طالبانو دعوت او ارشاد له خوا دا سمینار ترسره شو.
د معلوماتو له مخې دا سمینار د هلمند پوهنتون لپاره د طالبانو د دعوت او ارشاد امر عبدالقیوم ذاکر د دې پوهنتون مسولینو، استادانو، کارمندانو او محصلانو ته د شریعت له نظره د ځان وژني په اړه د پوهاوي سمینار وړاندې کړ.
طالبان وايي چي د سمینار موخه یې د ځوانانو ترمنځ د ځان وژنې څخه د ځان ژغورنې په اړه د اسلامي تعلیماتو په رڼا کي د عامه پوهاوي کچه لوړول وو.
د طالبانو د دوعوت او ارشاد امریت امر عبد القیوم ذاکر د سمینار په پیل کي وویل: د ځان وژنې موضوع په اوسني وخت کې د ځوانانو لپاره یوه جدي ستونزه ده.
د طالبانو دا مسوول چارواکی وايی په دې باور دی، چې اسلام د ژوند د ارزښت په اړه ډيرې روښانه لارښوونې لري او دا عمل د شریعت له نظره یوه لویه ګناه ګڼل کیږي.
دغه طالب چارواکی فقر او غربت، ژور خپګان او د نشه یي توکو استعمال د ځان وژنې علتونه بولي.
دا به داسې حال کې ده، چې طالبانو په تېره شل کلنه جګړه کې ځوانان ځانمرګي برید ته هڅولي او چمتو کړي دي.
د طالبانو درې کلنۍ واکمنۍ کې خراب اقتصادي وضعیت او بي کاري ډیری ځوانان مایوسه کړي دي، چې ځوانان ځان وژنې ته مخه کوي.