د افغانستان د پارلمان پخوانی غړی او په استانبول کې د پخوانیو افغان چارواکو د غونډې یو ګډونوال جعفر مهدوي وویل؛ افغانستان د افغانانو ګډ کور دی او په ترکیه کې د خبرو ترسره کول یو تاریخی مسوولیت دی. هغه له طالبانو وغوښتل چې له ټولو اړخونو سره د خبرو لپاره زمینه برابره کړي.
جعفر مهدوي چې په دې غونډه کې د ګډون په موخه له افغانستان څخه ترکیې ته تللی، پر اېکس شبکې خپور کړي پیغام کې یې لیکلي، چې په دې غونډه کې د کوم حرکت استازیتوب نه کوي.
طالبانو ته نږدې دغه څېرې په افغانستان کې تېرو جګړو ته په اشارې سره وویل، چې د استانبول په غونډه کې هېڅ یو ګډونوال جګړه او تاوتریخوالی د افغانستان د ستونزو د حل لاره نه ګڼي او د ټولو سیاسي ډلو ترمنځ د صادقانه خبرو پر اهمیت ټینګار کوي.
ښاغلي مهدوي وایي: "زه هیله لرم چې د طالبانو چارواکي دغه ارزښتناکه اسلامي او ملي مسوولیت درک کړي او د ریښتینو خبرو اترو لپاره مناسب او اغیزمن ګامونه پورته کړي."
دغه ناسته د پنجشنبې او جمعې په ورځو د ملي خبرو اترو د بهیر لومړۍ ناستې په نوم جوړه شوې وه، چې د افغانستان د روان وضعیت د بیا کتنې او د شته ننګونو د له منځه وړلو او سیاسي ثبات ته د رسېدو لپاره د ممکنه حل لارو په اړه پکې خبرې وشوې.
په دې ناسته کې د ښځو د حقونو یو شمېر فعالانو لکه شکریه بارکزۍ، فوزیې کوفي او شاه ګل رضايي هم ګډون درلود. د دې غونډې کوربه حکمت خلیل کرزی، مصطفی مستور او ادریس زمان وو. دوی په تېر حکومت کې د بهرنیو چارو او اقتصاد وزارتونو مرستیالان وو.
دا غونډه په داسې حال کې جوړه شوې، چې ټاکل شوې د ملګرو ملتونو په کوربه توب د افغانستان لپاره د دوحې څلورمه غونډه ډېر ژر جوړه شي.