د طالبانو تر کنټرول لاندې باختر اژانس خبر ورکړی، چې د روانې لړم میاشتې له لومړۍ نېټې تر دې دمه ۷۲۷ کورنۍ د سپین بولدک له لارې افغانستان ته ستنې شوې دي.

په کندهار کې د کډوالو اړوندو کمیټو مسوولینو دغه اژانس ته ویلي، دغه ۷۲۷ کورنۍ چې ټولټال ۳۷۴۸ کسان کېږي په تېرې یوې میاشت کې راستنې شوې دي.
په دغه راپور کې راغلي، چې په دې موده کې۲۲۲ تنه بنديان هم افغانستان ته را اړول شوي دي.
دغه راستنې شوې کورنۍ د مرستو ترلاسه کولو په موخه بېلابېلو بنسټونو ته ورپېژندل شوې دي.
همدا نن د دغه اژانس په یو بل خبر کې راغلي، چې تېره ورځ ۲۵۶ کورنۍ له دوو ګاونډیو هېوادونو راستنې شوې.
د دغه خبر له مخې، د دغو کورنیو له ډلې د تورخم له لارې ۱۶، د کندهار د سپین بولدک له لارې ۲۰، د نيمروز د ورېښمو پله له لارې ۴۵ او د هرات د اسلام کلا له لارې ۱۷۵ کورنۍ بېرته راستنې شوې دي.
له بل پلوه د کډوالو لپاره د ملګرو ملتونو عالي کمېشنرۍ ویلي، روان کال له ایران څخه د افغان کډوالو په راستنېدو کې ۱۸ سلنه زیاتوالی راغلی دی.