د روسیې د بهرنیو چارو وزیر د ارواسیا امنیت په تړاو د مینسک دویم نړیوال کنفرانس ته په خبرو کې ویلي، چې د امریکا او د هغې د متحدانو کړنو د ټولې اوراسیا امنیت ته ګواښ پېښ کړی.
سرګي لاوروف وايي، امریکا د افغانستان په بې ټیکاوه حالت کې د ښکېلېدو له لارې منځنۍ اسیا ته رسېدل غواړي.
د روسیې د بهرنیو چارو وزیر د پنجشنبې پر ورځ د لړم پر لسمه وویل، چې د متحده ایالاتو، ناټو او اروپايي ټولنې بریدګرو کړنو د ارواسیا ګډې لویې وچې د ټوټه کېدو ګواښ ډېر کړی.
سرګي لاوروف وویل، د دوی تر بحث لاندې د اروپا امنیتي جوړښت په دې معنا دی چې د ټیکاو او پوځي او سیاسي راتلونکي په تړاو د لویدیز یورو اتلانتیک له ګواښونونو نه د خوندیتوب یو رغنده ځایناستی شي.
لاوروف وویل، « لویدیځ د سویلي قفقاز په چارو کې لاسوهنه کوي او د ارمنیا او اذربایجان د سولې پر بهیر د اغیز او نفوذ هڅه کوي، په داسې حال کې چې متحده ایالات او ملګري یې هڅه کوي د افغانستان په بې ټیکاه وضعیت کې ځانونه دخیل کړي او له دې لارې په منځنۍ اسیا کې خپل حضور بېرته راژوندی کړي».
د روسیې د بهرنیو چارو وزیر د متحده ایالاتو په مشرۍ د سولې او جګړې موډلونه رد کړل.
نوموړي وویل، « نور پخوانیو موډلو ته ستنېدل، چې په هغو کې متحده ایالاتو د استثنايي توب انګیرنې له مخې مشري پر غاړه درلوده، ناشوني دي. په ځانګړې توګه په هرځای کې چې متحده ایالاتو ددې نندارې د وړاندې کولو هڅه کړې، په وضعیت کې بدلون نه دی راغلی».
د روسیې د بهرنیو چارو وزیر په پای کې وویل، چې باید نوي ژیوپولیټیک، نړیوال او حقوقي واقعیتونه په پام کې ونیول شي او نظرونه د زور له مخې نه بلکې د برابرۍ او ګټو د عادلانه انډول له لارې رامنځته شي.