د ترکیې د بهرنیو چارو وزارت په یوه بیان کې ویلي، تمه ده د ترکیې د سمندري ځواکونو دوه کښتۍ چې د دوه زره مساپرو د وړلو وړتیا لري د سې شنبې په ورځ بیروت ته ولاړې شي.

دغه وزارت زیاته کړه، هغه کښتۍ چې د ژغورنې چارې پر مخ وړي لبنان ته به بشري مرستې هم ولېږدوي.

دغه پرېکړه وروسته له هغه شوې، چې ځینو ترکانو د سمندر له لارې له لبنانه د دوی د اېستلو غوښتنه کړې وه.
د ترکیې په بهرنیو چارو وزارت کې یوې سرچینې رویټرز ته ویلي، چې شاوخوا ۲۵۰۰ ترکي وګړو له لبنانه د هغوی د اېستلو غوښتنه کړې وه.
د اسراییل او حزب الله ترمنځ د روانو جګړو له امله د ترکیې ترڅنګ ډېریو هېوادونه له لبنانه د خپلو وګړو د اېستلو هڅې ګړندۍ کړې دي.
ترکیې تر دې وړاندې ویلي و، چې د ترکیې له لارې د بهرنیو وګړو د احتمالي اېستلو لپاره له شاوخوا ۲۰ هېوادونو سره کار کوي.
له بل پلوه تېره اونۍ د بېلابېلو هېوادونو سلګونه کسان له لبنان څخه په یوې سوداګریزې بېړۍ کې ترکیې ته رسېدلي وو.
اسټرالیا، بلجیم، برازیل، چین، کاناډا، قبرس، ډنمارک، فرانسه، جرمني، یونان، اېټالیا، جاپان، هالنډ، پولنډ، پرتګال، رومانیا، روسیه، سلواکیا، سوېلي کوریا، اسپانیا، انګلستان او امریکا هغه هېوادونه دي چې ځینو یې خپل وګړي له لبنانه اېستلي او ځیني نور یې د خپلو وګړو د اېستلو هڅه کوي.