د ایران د صدا او سیما شبکې خبریال په ژوندۍ خپرونه کې، د دغه هېواد د مذهبي مشر علي خامنه یي د جمعې د لمانځه د مراسمو د خپرولو پرمهال ګواښ وکړ، چې سپاه پاسداران کولای شي چې په لندن کې د ایران انټرنشنل ودانۍ په نښه کړي.
د صدا او سیما شبکې خبریال احمد اکبر نژاد همداراز زیاته کړه، چې ایران انټرنشنل ډېر لېواله دی، چې د دغه هېواد په توغندیو سره په نښه شي.
دا په داسې حال کې ده، چې ایران په وار - وار د ایران انټرنشنل کارکوونکي ګواښلي دي.
که څه هم په ایران کې د ایران انټرنشنل شبکه میلیونونه لیدونکي لري، خو په دغه هېواد کې د یادې رسنۍ نشرات غیر قانوني دي.
دا په داسې حال کې ده، چې واشنګټن پوست د روان کال د وږي په ۲۲مه راپور ورکړی و، چې ایران د لوېدیځو جنایتکارانو د شبکو په واسطه په امریکا او اروپا کې خپل مخالفین ځپي.
د راپورونو له مخې، په وروستیو کلونو کې څو ځلې د یادې رسنۍ پر کارکوونکو ترهګریز بریدونه هم شوي دي، چې له دغو بریدونو وروسته بیا په ۱۴۰۱ کال کې دغې شبکې خپل ټلویزیوني موقت نشرات د لندن پر ځای له واشنګټن څخه پر مخ یوړل.
د یادولو ده، چې د افغانستان په څېر په ایران کې هم د حاکم نظام له لوري تر ډېره د بیان د ازادۍ مخه نیول شوې ده او د ایران انټرنشنل په شان د رسنیو د نشراتو لپاره خنډونه جوړیږي.