په ننګرهار ولایت کې له شړکنده بارانونو وروسته سېلابونو راوتلي، چې درې تنه په کې مړه او ۲۰ نور ټپیان دي.
د طالبانو تر کنټرول لاندې باختر اژانس په اېکس پاڼه کاږلي، چې دغه سېلابونه د ننګرهار ولایت په کوز کونړ ولسوالۍ کې راوتلي دي.

دغو سېلابونو شاوخوا ۱۵۰ کورونه هم ویجاړ کړي دي.
‏ورته مهال تېره شپه په لغمان ولایت کې هم د سختو بارانونو له امله سېلابونه راوتلي دي.
د باختر اژانس په لیکنه، سېلابونو د لغمان ولایت په مرکز مهترلام او الینګار ولسوالۍ کې یې خلکو ته درانه زیانونه اړولي دي.
له بل پلوه د طالبانو تر کنټرول لاندې د هواپوهنې ادارې (د تلې په ۶مه او ۷مه نېټه) په دولسو ولایتونو کې د شړکنده باران، تالندې برېښنا، تېزو سېلیو، خاورو دوړو او سېلابونو د راوتو اټکل کړی دی.
د دغې ادارې له‌خوا په یوې خپره شوې خبرپاڼه کې راغلي، چې دغه وړاندوینه د بدخشان، تخار، بغلان، نورستان، پنجشېر، کونړ، لغمان، کاپیسا، ننګرهار، کابل، پکتیا او خوست ولایتونو لپاره شوې ده.