د دوشنبې په ورځ د (ورلډ رېسک انډېکس) د ۲۰۲۴کال په راپور کې راغلي، پاکستان د هغو ۱۵ هېوادونو په کتار کې راغلی چې د جګړې ترټولو لوړ ګواښ سره مخامخ دي.

د راپور له مخې، پاکستان سږکال په دغه نوملړ کې د چین ځای نیولی دی.
د دغو ۱۵ هېوادونو له ډلې د جګړې د ښکېلو هېوادونو په ډلبندۍ کې کولمبیا، برازیل، پاکستان، مکسیکو، میانمار، نایجیریا، لبنان، عراق، سوډان او اسراییل د نوملړ په سر کې ځای لري.
فیلیپین د سږکال د لوړو ګواښوونکو هېوادونو په ډلبندۍ کې لومړی ځای لري، چې ورپسې اندونیزیا، هند، کولمبیا او مکسیکو راغلي.
د راپور له مخې، دا هغه هېوادونه دي چې د طبیعي پېښو له امله ترټولو زیات اغېزمن شوي دي.
په دغه راپور کې راغلي، چې د طبیعي پېښو پر وړاندې ترټولو ډېرو زیانمنوونکو هېوادونو په نوملړ کې اته یې د افریقا په وچه کې دي او پاتې دوه افغانستان او یمن دي.
راپور زیاتوي، چې دغه هېوادونه د بې وزلۍ، اداري فساد او جګړو له امله کافي اسانتیاوې نه لري او نه شي کولای چې د طبیعي پېښو پر وړاندې لازمې تابیاوې ونیسي.