د ماشومانو د ژغورنې صندوق په خپل تازه راپور کې ویلي، چې د روان میلادي کال په لومړیو شپږو میاشتو کې په ټول افغانستان کې د موسمي پېښو له امله لږ تر لږه ۳۸ زره ۴۷۷ کسان بې ځایه شوي دي.
دغه سازمان ویلي چې د دغو کسانو نیمايي یې ماشومان دي.
د دغه سازمان په وینا د سږکال د ۶ میاشتو بې ځایه شوو شمېر د تېر مېلادي کال له ټوټل ارقاموخه لوړ دي.
د ماشومانو د ژغورنې صندوق نن په خپل نوي راپور کې لیکلي، چې دغه کسان په افغانستان کې د وچکالۍ، د زیاتې تودوخې، سېلابونو، د ځمکې ښویېدو، واورو او توپانونو له امله د خپلو کورونو پرېښودو ته اړ شوي دي.
د ماشومانو د ملاتړ دغه سازمان وايي، تېر کال افغانستان په نړۍ کې د بې ځایه شویو ماشومانو تر ټولو لوی شمېر درلود.
د ماشومانو د ژغورنې صندوق د ملګرو ملتونو له قوله ویلي، چې په ۲۰۲۲ کال کې په افغانستان کې له هرو ۷ ماشومانو ۱ یې د اوږدمهاله بې ځایه کېدو سره مخامخ شوی.
دغه سازمان ویلي، چې دا شمېره په جنوبي اسیا کې تر ټولو لوړه ده او افغانستان د نړۍ په کچه دویم ځای لري.
د ماشومانو د ژغورنې صندوق وايي، افغانستان یو له هغو هېوادونو دی، چې د اقلیم له بحران سره د مقابلې توان نه لري او دا هېواد په نړۍ کې د اقلیم د بدلون په وړاندې شپږم زیانمن هېواد دی.
په افغانستان کې د ماشومانو د ژغورنې سازمان مشر ارشد ملک وویل: "اقلیمي بحرانونه په افغانستان کې بشري ناورین ته لمن وهي، خلک د خپلو کورونو پرېښودو ته اړ کوي، د اوبو سرچینې ویجاړوي او ښوونځي ته د ماشومانو د تګ مخه نیسي."
هغه زیاته کړه، په افغانستان کې د ۶۰ کلونو څخه د پورته عمر په پرتله ۵.۳ برابره زیات ماشومان په خپل ژوند کې له وچکالۍ سره مخ دي او دغه بحران د ماشومانو ژوند ته بدلون ورکوي.
دغه سازمان د ملګرو ملتونو له قوله لیکلي دي، چې په افغانستان کې له هرو ۳ نفرو څخه ا نفر د لوږې له بحران سره مخ دی او ددې بحراني وضعیت لامل د اقلیم بدلون او د خوراکي توکو د بیو لوړوالی دی.
په دغه راپور کې د ملګرو ملتونو له قوله راغلي دي، چې له ۳۴ ولایتونو څخه ۲۵ ولایتونه په افغانستان له وچکالۍ سره مخامخ دي، چې د افغانستان نیم نفوس ددې اغېز لاندې راولي.
د ماشومانو د ژغورنې صندوق زیاتوي، چې څیړنې په پرله پسې ډول ښیي چې نجونې او ښځې د نارینه وو په پرتله په غیر متناسب ډول د طبیعي پېښو له امله اغېزمنې کیږي.
د ماشومانو د ژغورنې صندوق سازمان وايي د طالبانو له واکمنۍ له پیل څخه په تېرو درېیو کلونو کې افغانستان ته د مرستو په رسولو کې د پام وړ کموالی راغلی او له بشري سازمانونو څخه دا تمه نه شي کېدای چې دغه تشه ډکه کړي.
دغه سازمان له نړۍوالې ټولنې څخه د شته اړتياوو د پوره کولو او د اقليمي بدلون د بحران پر وړاندې د اوږدمهاله پلان جوړولو لپاره د لا زياتو مرستو غوښتنه کړې ده.