د طالبانو د ټرانسپورټ او هوایي چلند وزارت د هوا پېژندنې ریاست سبا ته د هېواد په ۱۳ ولایتونو کې د بارانونو، سېلابونو او تېزو بادونو اټکل کړی دی.

دغه ریاست د یوې خبرپاڼې په خپرولو سره په بدخشان، نورستان، کونړ، لغمان، ننګرهار، لوګر، پکتیا، خوست، پکتیکا، غزني، میدان وردګ، زابل او کندهار ولایتونو کې د بارانونو، سېلابونو او تېزو بادونو د پېښېدو اټکل کړی دی.
د خبرپاڼې له مخې؛ د ورېدونکو بارانونو کچه په بېلابېلو سیمو کې (له ۱۵ تر ۴۵ ) ملي مترو وړاندوینه شوې ده.
په خبرپاڼه کې دغه راز راغلي، چې په شمالي، لوېدیځو، سوېلي، ختیځو او مرکزي ولایتونو کې د چټکو بادونو، خاورو او دوړو د را الوتلو اټکل هم شوی دی.
په خبرپانه کې د دغو چټکو بادونو، خاورو او دوړو د سرعت کچه بیا په بېلابېلو سیمو کې له (۵۰ تر ۹۰) کیلومتره په ساعت کې بلل شوې ده.
افغانستان له هغو هېوادونو څخه دی، چې د نړۍوال اقلیم له بدلون وروسته د زلزلو، بارانونو او سېلابونو په شان ډېرو طبیعي پېښو ځپلی دی.