د پاکستان د پارلمان پخواني غړي محسن داوړ، د افغانستان د ملي دفاع وزارت پخواني سرپرست شاه محمود میاخېل، د افغانستان د کورنیو چارو پخواني وزیر عمر داودزي، راشد خان او یو شمېر سیاستوالو د ګیله من وزیر پر مړینې خواشیني څرګنده کړه.
د پاکستان د پارلمان پخوانی غړی وایي، چې د ګیله من وزیر په څېر لږ کسان کولی شي ظالمانه شرایط بیان کړي.
محسن داور د ګیله من وزیر د مړینې په غبرګون په خپل اېکس کې لیکلي: «د افغان وطن له مينې څخه ډکه خوږه شاعري به دې د تل لپاره زموږ په زړونو کې وي.»
د نوموړي په خبره؛ د ګیله من وزیر شاعري به راتلونکو نسلونو ته الهام ورکوي.
د پښتون ژغونې غورځنګ د مرکزي کمېټې غړی او شاعر ګیله من وزیر چې څو ورځې وړاندې په سر وهل شوی و، څو شېبې وړاندې په روغتون کې مړ شو.
د پښتون ژغورنې غورځنګ مشر منظور پښتین نن په اسلام اباد کې خبریالانو ته ویلي، چې هغه له درېیو ورځو درملنې وروسته په روغتون کې مړ شو.
منظور پښتین دغه راز په خپل اېکس کې لیکلي: «ما په ژوند کې تر ټولو ما ته نږدې، خوږ او وفادار ملګری، یو پیاوړی ننګیالی د خپلواکۍ او افغانیت مبارز، د پي ټي ام مخکښ، د پښتون افغان اولس ریښتینی ترجمان شاعر ګیله من پشتین د استعماري جابر ریاست د ظلم پر خلاف او د خپلواکۍ په خاطر مبارزه کې شهادت قبول کړو خو سر یې ټیټ نه کړو.»
د ګیله من وزیر مړینه د زرګونو پښتونو له پراخو غبرګونونو سره مخ شوی دی.
د پخواني ولسمشر محمد اشرف غني ځانګړي استازي او د کورنیو چارو پخواني وزیر عمر داودزي هم د ګیله من وزیر په مړینه خواشیني څرګنده کړې.
نوموړي په خپل اېکس کې لیکلي: «په وینو یې د مبارزې لاره روښانه شوه، ګیله من ته د جنت او کورنۍ او ملګرو ته یې د صبر دعا کوم.»
له دې سره؛ د افغانستان د کرېکټ د ملي لوبډلې لوبډلمشر او د کرېکټ د نړۍ ستوري راشد خان په خپل فېسبوک کې د ګیله من وزیر د مړینې په اړه خواشیني څرګنده کړه.
د پښتون ژغورنې غورځنګ مشر منظور پښتین نن د شپې ناوخته وویل، چې له ټولو هڅو سره - سره ډاکتران ونه توانېدل چې ګیله من وزیر وژغوري.
هغه زیاته کړه، چې د نوموړي جسد به سبا خپل پلرني ټاټوبي وزیرستان ته انتقال شي.
د غبرګونونو پر دوام د کابل پوهنتون استاد اسماعیل یون ویلي، چې د نړۍ یو ستر پولادي انسان نن له نړۍ څخه سترګې پټې کړې .
نوموړي په خپله فېسبوک پاڼه کې لیکلي: «ما ته تر ټولو دردوونکې خبره دا ده چې نن پر خپله پاڼه د داسې یو ستر انسان د شهادت خبر خپروم، چې خپله ټوله ځواني یې د انسانیت او افغانیت د داعیې د بریا او ځلا لپاره وقف کړې وه.»
نوموړي دغه راز ویلي: «ګیله من وزیر افغان نور زمونږ په منځ کې نه شته، خو د ملت په زړه او د تاریخ په حافظه کې به د تل لپاره ژوندی وي.»
بل خوا د افغانستان د ملي دفاع وزارت پخواني سرپرست او د جمهوري غوښتونکو د سیاسي اړیکو مشر شاه محمود میاخېل هم د ګیله من وزیر د مړېنې په غبرګون ویلي، چې د هدف د ترلاسه کېدو لپاره باید ستراتیژي بدله شي، ځکه ظالم حکمرانان تل هڅه کوي د سر سړي له منځه یوسي.
نوموړی وایي: «د ګیله من وزیر نوم به تر ابده د افغانانو په زړونو کې ځای ولري.»
ښاغلی میاخېل زیاتوي، چې ټول افغانان د ګیله من ارمانونه په متحد کېدو سره پوره کولی شي.
د ولسي جرګې پخواني غړي کمالناصر اصولي هم د ګیله من وزیر پر مړینې خواشیني څرګنده کړه.
ښاغلي اصولي په خپل اېکس کې لیکلي: «د ګیله من وجود به نه وي، خو ځوانانو ته یې شعور ورکړ، غږ او فکر یې نورو ته لاره وښوده، زه باور لرم چې تر کلونو به ځوانان په همدغه لاره مزل کوي، تر څو منزل ته ورسېږي.»
د یادولو ده، چې ګیله من وزیر د سیاسي مبارزې ترڅنګ شاعري هم کوله، چې د افغان وطن او ولس روانې ستونزې په کې بیان کړي دي.
هغه د شپږو خوېندو او درېیو ورونو کوچنی ورور دی.