د کډوالو په چارو کې د ملګرو ملتونو عالي کمېشنرۍ وايي، وروستیو ورښتونو او سېلابونو د افغانستان په شمال، شمال ختیځ او لوېدیځو سیمو کې ۱۰ زره ۵۸۳ کورونه زیانمن کړي دي.
دغه سازمان وايي، یوازې د افغانستان په لویدیځ کې د سېلابونو له امله څه باندې ۶۰ زره کورنۍ زیانمنې شوې دي.
د دغه سازمان په تازه راپور کې راغلي، چې د تېرې میاشتې په وروستیو کې د سېلابونو له امله په بغلان کې ۱۵۰ کورونه ویجاړ شوي او په دغه ولایت کې عامه زېربناوو ته پراخ زیانونه اوښتي دي.
د کډوالو چارو عالي کمېشنرۍ وايي، له سېلاب ځپلو سره د مرستې او د کورونو د برابرولو لپاره ۱۴،۶ میلیونه ډالرو ته اړتیا ده.
د دغه سازمان په راپور کې راغلي، چې په لوېدیځو سیمو کې سېلابونو څه باندې دوه زره هکتاره ځمکه ویجاړه کړې او په شمال او شمال ختیځو سیمو کې پنځه زره او ۵۰۰ کورنیو ژوند له خنډ سره مخ کړی دی.
په دغه راپور کې ویل شوي چې بغلان او غور ولایتونه د سېلابونو او بارانونو له امله تر ټولو زیات زیانمن شوي او د دغو ولایتونو اوسېدونکي سرپناه ته اړتیا لري.
افغانستان د طبیعي پېښو سره مخامخ دی او ملګري ملتونه دغه هېواد د اقلیم د بدلون په برخه کې یو له ډیرو زیان منونکو هېوادونو څخه بولي.
په دې وروستیو کې د بامیان ولایت د یکاولنګ ولسوالۍ په درېیو کلیو کې د سېلابونو راوتلو له امله اوه تنه مړه او لس نور ورک شوي دي.