هندي چارواکو د لومړي وزیر نریندرا مودي پر حکومت نیوکه کوونکې لیکوالې اروندتي رای د محاکمه کولو امر صادر کړی دی.
د حکم له مخې، اغلې رای د هندي کشمیر په اړه په ۲۰۱۰ کې په یوه پېښه کې د هغې د څرګندونو له امله د ترهګرۍ ضد قانون لاندې محاکمه کیږي.
اروندتي رای هغه وخت ویلي وو: «کشمیر هیڅکله له هند څخه بېلېدونکې برخه نه وه. دا یو تاریخي حقیقت دی.»
د هندي رسنیو د راپورونو له مخې هندي چارواکو د کشمیر د مرکزي پوهنتون د پخواني استاد شیخ شوکت حسین پر ضد د قانوني قضیې پیلولو اجازه هم ورکړې ده.
دا حکم د ډیلي د مرستیال والي وینا کمار سکسینا لخوا د واکمن بهارتیا جنتا ګوند لخوا صادر شوی.
څوارلس کاله مخکې د مېرمن رای څرګندونې د بهارتیا جنتا ګوند د چارواکو او پلویانو له سختو نیوکو سره مخ شوې وې. له دغو څرګندونو وروسته د یادګوند د ښځو د سازمان لسګونو غړو د لیکوالې کور کلابند کړ او له هغه یې وغوښتل چې خپلې خبرې دې بېرته واخلي او له هنده دې ووځي.
۶۲ کلنه اروندتي رای د هند یوه له مشهورو لیکوالو څخه ده چې د نریندرا مودي پر حکومت یې د لږکیو پر ضد د قوانینو په رامنځته کولو باندې په ښکاره نیوکې کړې دي.
د هند کمونیست ګوند د ډیلي د سیمه ییز حکومت دغه ګام غندلی او دغه هڅه یې د «فاشیستي منطق» پایله بللې ده.
د اروندتي رای مشهور ناول «د کوچنیو شیانو خدای» چې په فارسي ژبه هم ژباړل شوی، په ۱۹۹۷ کې د بوکر معتبره جایزه وګټله.