د پاکستان لومړي وزیر شهباز شريف د قرغزستان په پلازمینه بشکيک کې د پاکستاني زده کوونکو پر وضعیت ژوره انديښنه څرګنده کړې او هغوی سره یې د بیړنۍ مرستې لارښونه کړې ده.
د قرغزستان پولیسو وویل، چې دوی د جمعې په ورځ د دغه هیواد په پلازمینه کې د تاوتریخوالی د کمولو لپاره امنیتي ځواکونه منسجم کړي دي. په بیشکیک کې سلګونو قرغزیانو په هغو ودانیو برید کړی چې د پاکستاني محصلینو په ګډون بهرني محصلین پکې استوګن دي.
پولیسو وايي، چې لومړی برید د بهرنیانو لخوا شوی و - چې هویت یې لا معلوم نه دی، او په ښار کې یې ځایی خلک وهلي وو.
ښاغلي شریف پر اېکس ټولنیزې شبکې خپور کړي پیغام کې ویلي، چې د پاکستان سفیر ته لارښوونه شوې چې زده کونکو ته ټولې اړینې مرستې چمتو کړي.
نوموړي ویلي، چې د لومړي وزیر دفتر په قرغزستان کې د پاکستان سفارت سره په تماس كې دى او په مسلسل ډول د حالاتو څارنه كوي.
شهباز شريف په قرغزستان كې د پاكستان سفير سره ټيليفوني خبرو کې نوموړي ته لارښونه کړې چې د زده کوونکو استوګنځي ته ورشي او ورته اړینې مرستې برابرې کړي.
هغه له سفیر څخه وغوښتل چې د زده کوونکو له کورنیو سره په دوامداره توګه اړیکه ونیسي او هغوی ته په وخت معلومات ورکړي.
د پاکستان سفارت ته هدایت ورکړل شوی، چې ژوبل شوو زده کوونکو ته روغتیایې اسانتیاوې برابرې کړي او هغه زده کوونکي چې غواړي بیرته پاکستان ته راستانه شي، د دولت له خوا ورته ټیکټونه واخیست شي.
ښاغلي شریف وویل، چې خپله د قرغزستان وضعیت څاري او ډاډ یې ورکړ چې پاکستاني محصلین به په دې حالت کې یوازې نه پریږدي.
په همدې حال کې د پاکستان د بهرنیو چارو وزارت د شنبې په ورځ وویل، چې په بشکیک کې د پاکستاني محصلینو پر وړاندې د تاوتریخوالي په غبرګون کې یې په دغه هېواد کې د قرغزستان سفیر احضار کړی او ورته یې د احتجاج یو یاداشت سپارلی دی.
د پاکستان د بهرنیو چارو وزارت په یوه اعلامیه کې وویل: "د قرغزستان سفیر ته ویل شوي چې د قرغزستان حکومت باید د پاکستاني زده کونکو او وکړو د خوندیتوب د یقیني کولو لپاره ټول ممکنه اقدامات وکړي."
د قرغزستان د روغتیا وزارت په خبرپاڼه کې ویل شوي، چې په دغه تاوتریخوالي کې ژوبل شوي څلور پاکستاني زده کوونکي تر لومړنیو درملنو وروسته رخصت شوي دي او یو لا هم په روغتون کې بستري دی.