د پاکستان پوځ ویاند دغه څرګندونې د مې د ۹مې نېټې په درشل کې پرون کړې وې، چې نن یې ټیک یو کال پوره شو.
د تېر کال د مې په ۹مه د تحریک انصاف د مشر او د پخواني وزیر عمران خان د نیول کېدو پر ضد د شویو مظاهرو پر مهال د ځینو دولتي ودانیو تر څنګ یو شمېر پوځي ودانۍ هم زیانمنې شوې وې.
عمران خان د دغې کلیزې په تړاو په ټول هېواد کې د احتجاجونو غږ کړی.
د پاکستان حکومت بیا د مې ۹مه توره ورځ بللې او د پنجاب او سند ایالتي حکومتونو د دغې ورځې د رسمي غندنې په اړه پرېکړه لیکونه هم منظور کړي دي.
که څه هم چې د تېر کال په لاریونونو کې دولتي ودانیو ته زیان رسونه د پاکستان په تاریخ کې څه نوې خبره نه وه؛ خو هغه څه چې ډېر د پام وړ و، هغه دا و چې لاریونوالو په لومړي ځل پر پوځی اډو چپاو یووړ، چې دې کار حکومت سخت په غوصه کړ او په اړه یې توند غبرګون وښود.
حکومتي چارواکو وویل، دغسې کړنې د هېواد او حکومت د ړنګولو هڅه ده او هغه یې د ټول قوم خلاف چاره وبلله.
له دې سره هممهاله د تحریک انصاف د مشرانو په ګډون زرګونه کسان ونیول شول او زندانونو ته واچول شول.
د تحریک انصاف ګوند یو مخکښ غړی منصور خان افغانستان انټرنشنل ته وویل: د دوی لاریونونه سولهییز وو؛ خو یو شمېر کسانو د دوی د بدنامولو لپاره ځینې هڅې وکړې او پر پوځي اډو یې چپاو یووړ او دوی ته یې بدنامي واړوله.
خو د دغو تاوتریخجنو لاریونونو وروسته د دغه ګوند ځینو مخکښو مشرانو له ګونده استعفا ورکړه او له سیاسي هلو ځلو تېر شول؛ خو لا هم د دغه ګوند یو شمېر غړي په دې اند دي، چې د دغو پرمختیاوو وروسته عمران خان سره د خلکو مینه لا زیاته شوه.
د دغه ګوند یو شمېر غړي وايي، د پوځ سره د دوی راغلی ټکر په سیاسي ډګر کې دوی ته د زیان پر ځای ګټه ورسوله.
خو لا هم د تحریک انصاف ګڼ غړي په زندانونو کې دي او لا یې هم قضیې د نورو محکمو پر ځای په پوځي محکمو کې تر څېړنو لاندې دي.
تحریک انصاف وايي، چې دا مهال تر لسو زرو زیات پلویان یې په بند کې ساتل شوي دي.
یو شمېر سیاسي کتونکي وايي، د ۲۰۲۳ کال د مې میاشتې تاوتریجنو لاریونونو، له اقتصادي کړاوه ډګ او له امنیتي ننګونو سره مخامخ پاکستاني حکومت ته داسې ګوزار ورکړ چې نن سبا یې زور د دغه هېواد ټولو برخو ته رسېدلی دی.