د پاکستان د ترهگرۍ ضد اداره وايي؛ په راولپنډۍ ښار کې يې په عملياتو کې د پاکستاني طالبانو دوه "مهم" غړي وژلي دي.
دغه ادارې زياته کړه، چې دغو پاکستاني طالبانو په ښار کې په تروريستي بريدونو کې لاس درلود.
د راولپنډۍ د ترهګرۍ ضد ادارې د یکشنبې په ورځ (د غويي ۱۶مه) په یوه خبرپاڼه کې د تحریک طالبان پاکستان د دغو "کليدي غړو" نومونه احسان الله او نصیب الله اعلان کړل.
دغه رياست زياته کړه، چې دغو دوو پاکستاني طالبانو تېره اونۍ په راولپنډۍ ښار کې د پوليسو پر يوه مامور په بريد کې لاس درلود.
تېره اونۍ په راولپنډۍ کې د پاکستاني طالبانو په ډزو کې د پاکستان ځانګړو ځواکونو یو چارواکی ووژل شو او د ځانګړو ځواکونو یو بل غړی ټپي شو.