نیویارک ټایمز راپور ورکړی، چې که څه هم په غزه کې د اوربند او د حماس له خوا د اسراییلي یرغمل شویو بندیانو د خلاصون په اړه په خبرو کې پرمختګ شوی، خو دواړه لوري لا هم پر ځینو مهمو مسایلو اختلاف لري.
دغه راپور چې د یکشنبې په ورځ د جنوري په ۲۳مه خپور شوی په کې راغلي، چې په دغو خبرو اترو کې د اختلاف یو ټکی له غزې تړانګې څخه د اسراییلي پوځ د وتلو د مهالوېش او اندازه ده.
نیویارک ټایمز د مذاکره کوونکو پر وړاندې ننګونو ته په اشارې سره زیاته کړه، چې د غزې د جګړې د دایمي پای ته رسولو په اړه د اسراییل دریځ لا هم روښانه نه دی.
په همدې حال کې د اسراییل د لومړي وزیر دفتر د ډسمبر په ۲۲مه اعلان وکړ، چې د بنیامین نتنیاهو له موافقې وروسته به د دغه هېواد یو لوړ پوړی پلاوی د اوربند د خبرو د دوام لپاره د قطر پلازمېنې دوحې ته ولاړ شي.
د موساد مشر ډېوېډ برنیا د امنیتي ادارې (شین بیت) مشر رونن بار، د لومړي وزیر سیاسي سلاکار اوفیر فالک او د یرغمل شویو په چارو کې د اسراییل د پوځ استازی نتزان الون په دې غونډه کې د پلاوي په توګه حضور لري.
نيويارک ټايمز د خپل راپور په دوام کې د يوې فلسطيني سرچينې او دوو اسراييلي چارواکو په حواله ليکلي، چې اسراييل د اوربند په خبرو اترو کې پر يوه "مبهم فورمول" ټينګار کوي، چې د بېلابېلو تعبيرونو لپاره لاره پرانيزي.
رسنیو زیاته کړې وه، چې امریکا باید منځګړو ته تضمین ورکړي چې په غزه کې د روانې شخړې د پای ته رسولو لپاره به کار کوي، خو اسراییل تر اوسه د "هېڅ دقیقې کلمې" سره موافقه نه ده کړې چې دا مسله په روښانه توګه تعریف کړي.
په دې توګه د اسراییل او حماس ترمنځ د "اوربند د دوام" د بنسټیزې مسلې پر سر شخړه دوام لري او نتنیاهو تر اوسه د روانې جګړې د دایمي پای ته رسولو له منلو ډډه کړې ده.
د تېر کال د مې میاشتې په ۱۵مه (د ۲۰۲۳ کال د اکټوبر ۷مه) د حماس غړو د اسراییل پر جنوبي سیمو په بریدونو کې شاوخوا ۱۲۰۰ کسان ووژل او تر ۲۵۰ ډېر یې یرغمل کړل.
د دغه برید په ځواب کې اسراییل په غزه کې پراخ پوځي عملیات پیل کړي، چې د حماس د روغتیا وزارت په وینا تر اوسه تر ۴۶ زره زیات کسان وژل شوي او ۱۰۹ زره نور ټپیان شوي دي.