د روسیې د بهرنیو چارو وزارت ویانده وایي، تر هغه چې طالبان د دغه هېواد د ترهګرو ډلو له نوملړ څخه نه وي اېستل شوی، له دغې ډلې سره د اړیکو پراختیا ناشونې ده.
ماریا زاخاروا زیاته کړه، چې له افغانستان څخه د ترهګریزو ګواښونو د مخنیوي لپاره له طالبانو سره د اړیکو پراختیا اړینه ده.
د روسیې د بهرنیو چارو وزارت ویاندې د چهارشنبې په ورځ وویل: «موږ په وار - وار ویلي چې روسیه د نړۍ د نورو قدرتونو په څېر له افغانستان څخه د ترهګرۍ ګواښونو او د نشه یي توکو د قاچاق په ګډون د ګډو ګټو په مسلو کې له کابل سره عملي همکاري کوي.»
هغې زیاته کړه: «دې موخې ته رسېدل تر هغې ناشونې ده، چې طالبان د ترهګرو ډلو په نوملړ کې وي.»
زاخاروا د هغه لایحې یادونه هم وکړه، چې د نومبر په ۲۵ د روسیې دوما ته وړاندې شوې ده.
د روسیې د دوما ځینو استازو د یوې لایحې مسوده وړاندې کړه، چې له مخې یې د روسیې د ترهګرو ډلو له نوملړ څخه د طالبانو نوم په موقت ډول واېستل شي.
د روسیې د پارلمان ۱۲ غړو دغه طرحه پارلمان ته وړاندې کړې ده.
د روسیې اوسني قوانین په موقتي توګه د منع شویو سازمانونو د فعالیتونو د ځنډولو وړاندوینه نه ده کړې.
طالبانو لوړپوړو چارواکو د دوشنبې په ورځ د روسیې د امنیت شورا له منشي سرګي شویګو سره تر کتنې وروسته وویل، چې کرملین ژمنه کړې چې د روسیې د ممنوع الخروج سازمانونو له نوملړ څخه به د طالبانو نوم لرې کړي.
خو د کرملین ویاندې ټینګار کړی، چې تر اوسه په دې اړه کومه پرېکړه نه ده شوې.