د ملګرو ملتونو د بشري مرستو د همغږۍ اداره (اوچا) وایي، چې په افغانستان کې د محدودیتونو زیاتېدو ښځې او نجونې زیانمنې کړي دي.

دغې ادارې د سې شنبه په ورځ د ښځو پر وړاندې د تاوتریخوالي د له منځه وړلو د نړۍوالې ورځې په مناسبت وویل، چې په افغانستان کې د ښځو غږ خاموشه شوی دی.
اوچا زیاتوي، چې د طالبانو تر واک لاندې افغانستان کې د ښځو حقونه له پامه غورځول شوي دي.
د ملګرو ملتونو د بشري مرستو د همغږۍ اداره دغه راز له نړۍوالو غواړي، چې په افغانستان کې د ښځو او نجونو د بشپړو انساني حقونو ملاتړ وکړي.
یادې ادارې په خپل اېکس کې لیکلي: «په افغانستان کې ښځې او نجونې له سختو محدودیتونو سره مخ دي. غږ یې خاموشه شوی دی او حقونه یې له پامه غورځول کېږي.»
دا په داسې حال کې ده، چې د بشري حقونو ادارې د ښځو پروړاندې د تاوتریخوالي د مخنیوي په ۱۶ ورځیني کمپاین کې په ټوله نړۍ کې د ښځو او نجونو لپاره د عدالت غوښتنې پر ارزښت ټينګار کوي.
دغه کمپاین چې د دوشنبې په ورځ پیل شوی، ټاکل شوې چې د همدې میاشتې تر شلمې نېټې دوام وکړي.
طالبانو له تېرو درېیو کلونو راهیسې د ښځو د زده کړو په ګډون په لسګونو نورو لومړنیو حقونو بندیزونه لګولي، چې له پراخو غبرګونونو سره مخ دی.
که څه هم د بندیزونو په پیل کې طالبانو ویلي و، چې د اصلاحاتو او بدلونونو په راوستلو سره به د نجونو ښوونځي او پوهنتونونه بیا پرانېستل شي، خو له څه باندې درېیو کلونو راهیسې په دې برخه کې د طالبانو د اقدام کوم څرک نه لیدلی کېږي.
د طالبانو دا پرېکړه له پراخو کورنیو او بهرنیو غبرګونونو او اعتراضونو سره هم مخ ده، خو دغې ډلې بیا په وار - وار سره ویلي، چې دا مسایل د افغانستان کورنۍ موضوعګانې دي او هېچا ته د لاسوهنې اجازه نه ورکوي.
منځنۍ او لوړې زده کړې، په دولتي ادارو کې کار کول، له محرم پرته سفر، ورزش، سیاسي مشارکت او په ډېریو ولایتونو کې په رسنیو کې د ښځو د کار کولو مخنیوی هغه بندیزونه دي، چې طالبانو په تېرو درېیو کلونو کې پر افغان ښځو وضع کړي دي.