په پاکستان کې د پولیو یوه بله تازه پېښه هم ثبت شوې، چې له دې سره په روان کال کې په دغه هېواد کې د پولیو د مثبتو پېښو شمېر ۴۹ ته لوړ شو.

د پولیو دغه وروستۍ پېښه د پاکستان د بلوچستان صوبې په جعفراباد سیمه کې ثبت شوې ده.
روان کال بلوچستان د پولیو له اړخه د پاکستان ترټولو ډېره ځپل شوې صوبه ده، چې لږ تر لږه ۲۴ پېښې په کې ثبتې شوې دي.
تېره اونۍ، د خیبر پښتونخوا په ډېره اسماعیل خان کې د روان کال د پولیو لومړۍ پېښه ثبت شوې وه.
په روان کال کې د ټولو ۴۹ پېښو له ډلې ۲۴ یې په بلوچستان کې، ۱۳ یې په سند کې، ۱۰ یې په خیبرپښتونخوا کې او په پنجاب او اسلام اباد کې بیا یوه، یوه پېښه راپور شوې ده.
پاکستان یو له هغو دوو هېوادونو څخه دی، چې د پولیو ویروس په کې لا تر اوسه له منځه نه دی تللی.
د پاکستان روغتیایي چارواکي په کورنیو غږ کوي، چې د حکومت له‌خوا په مکرر ډول د پولیو واکسین کمپاینونو کې په فعاله توګه برخه واخلي او د دغې ناروغۍ په مخنیوي کې دې مرسته وکړي.