د سپاه پاسداران د قوماندان ځای ناستي سردار فدوي ویلي، چې اسراییل ته به پېښمانوونکی ځواب ورکړي.

نوموړي دغه څرګندونې تېره ورځ په قم کې د حسن نصرالله د مړینې د څلوېښتۍ مراسمو کې یوې غونډې ته د وینا پرمهال کړې دي.
هغه د اسراییل د برید په اړه ویلي، چې اسلامي انقلاب په خپلې ۴۵ کلنې موده کې هیڅ «تېری» بې ځوابه نه دی پرېښی او خامخا به د اسراییل دغې کړنې ته پېښمانوونکی ځواب ورکړي.
هغه اسراییل ته په اشارې سره وویل:« د انقلاب له پیل راهیسې زموږ په وړاندې جنګېدلي؛ خو بریا تل زموږ وه.»
نوموړي له حزب الله څخه پر هر اړخیز ملاتړ ټینګار سره وویل، له حزب الله څخه به د تېر پرتله ژورې او چټکې مرستې وکړو او هر اړخیز ملاتړ ته بې دوام ورکړو.
له بل پلوه د سپاه پاسداران عمومي قوماندان حسین سلامي ویلي:« تر پایه به له اسراییل سره جنګېږو او اجازه نه ورکوو، چې د مسلمانانو پر برخلیک ولکه ټینګه کړي.»
هغه زیاته کړه: «تاسو به له سختو ګوزارونو سره مخ شئ او موږ به غچ واخلو، په تمه اوسئ.»