د امریکا منتخب ولسمشر ډونالډ ټرمپ د فاکس نیوز د خپرونو کوربه د دغه هېواد د دفاع وزیر په توګه نومولی دی.
د امریکا منتخب ولسمشر ډونلډ ټرمپ ویلي، چې د فاکس نیوز کوربه او پخوانی پوځي افسر پېټ هګزېټ د دفاع وزیر په توګه نوموي.
د اسوشیټیډ پرېس په وینا، پېټ هګزېټ تر دې وړاندې په عراق او افغانستان کې دنده ترسره کړې او د امریکا د کانګریس غړی هم پاتې شوی دی.
ټرمپ په یوه بیان کې ویلي، پېټ هګزېټ ته د دغه مسوولیت ورکول د امریکا دوښمنانو ته دا پیغام ورکوي چې د امریکا پوځ به یو ځل بیا ځواکمن شي.
ټرمپ د سې شنبې په ورځ اعلان وکړ، چې هغه د ملي استخباراتو پخوانی رییس جان رټکلیف د (سي ای اې)مشر ټاکلی.
ټرمپ وویل، چې د ارکنزاس پخوانی والي مایک هاکبي به په اسراییل کې د سفیر په توګه وټاکي.
ډونالډ ټرمپ وویل، اېلان ماسک او د جمهوري غوښتونکو پخوانی کاندید ویویک راماسوامي به د نوي 'دولتي موثریت څانګې' مشري وکړي.
له بل پلوه ډونالډ ټرمپ تېره ورځ سناتور مارکو روبیو د خپلې ادارې د بهرنیو چارو وزیر، مایکل والز د ملي امنیت سلاکار په توګه او لي زلدین د امریکا د چاپېریال ساتنې سازمان د مشر په توګه معرفي کړي وو.