د امریکا د عدلیې وزارت ویلي، فرهاد شاکري چې د ایران له‌خوا د ټرمپ د وژلو لپاره ګومارل شوی و، په خټه افغان دی.

دغه وزارت په یو بیان کې لیکلي، چې د منتهن په فډرالي محکمه کې د یو شکایت له مخې د سپاه پاسداران یو چارواکي په تېره سپټمبر میاشت کې له شاکري غوښتي و، چې د ټرمپ د وژلو لپاره یوه تګلاره جوړه کړي.
د امریکا د عدلیې وزارت د جمعې په ورځ د ډونالد ټرمپ د ترورولو په اړه د ایران د حکومت له‌خوا د جوړې شوې توطیې په اړه تازه جزییات خپاره کړل.
د امریکا د عدلیې وزارت په وینا، د سپاه پاسداران یوه چارواکي شاکري ته ویلي و چې که له ټاکنو وړاندې یې ټرمپ ترور نه شو کړای؛ نو دغه چاره دې له ټاکنو وروسته ترسره کړي.

د هغه په وینا، کېدای شي ټرمپ په ټاکنو کې ماته وخوري چې هغه مهال به یې ترورول اسانه هم شي.
امریکایي څارنوالانو ویلي، شاکري ته تر دې وړاندې هم په امریکا کې د امریکایي او اسراییلي چارواکو سپارښتنې شوې وې؛ خو د سپاه پاسداران چارواکو ډېر ټینګار په دې کاوه، چې خپله ټوله پاملرنه باید د ټرمپ په ترور ورټوله کړي.
د امریکا د عدلیې وزارت په وینا، فرهاد شاکري د ایران د سپاه پاسداران له‌خوا ګومارل شوی و، هغه په ایران کې ژوند کړی او په ماشومتوب کې امریکا ته مهاجر شوی دی او په ۲۰۰۸ کال کې د غلا په تور ۱۴ کاله بندي شوی و او بیا د همدغه تور له امله له امریکا اېستل شوی و.
د عدلیې وزارت په بیان کې راغلي، چې شاکري اېف بي ای ته ویلي، هغه نه غوښتل د هغو اوو ورځو په ترڅ کې چې سپاه پاسداران هغه ته د ټرمپ د وژلو د پلان جوړولو لپاره مهلت ورکړی و دغه پلان جوړ کړي.
د امریکا د عدلیې وزارت د جمعې په ورځ درې کسه د امریکایي وګړو د ترور په تور له هغې ډلې د ډونالد ټرمپ د وژلو په تور تورن کړي دي.
د امریکا د عدلیې وزارت د بیان له مخې، ۵۱ کلن شاکري د ایران اوسېدونکی، د نیویارک د بروکلین اوسېدونکی ۴۹ کلن کارلایل ریورا مشهور په «پاپ» او د نیویارک د اسټاتن ایلنډ اوسېدونکی ۳۶ کلن جاناتان او د هولټ، د یو امریکایي وګړي د وژلو په تور تورن شوي دي.
د ایران یوه سیاسي مخالفه د بشري حقونو فعاله او خبریاله مسیح علي نژاد په خپله اېکس پاڼه لیکلي، هغه متوجه شوې چې اېف بي ای هغه دوه کسه نیولي چې په امریکا کې یې د ترورولو پلان لاره.
په دغې لیکنه کې راغلي، چې شاکري، لودهولت و ریورا د خپلو هڅو په دوام یو بل ته عکسونه او پیغامونه هم استولي دي.
تر دې وړاندې د امریکا حکومت هم منلې وه، چې ایران د قاسم سلیماني د وژلو په غچ کې غواړي، د ډونالد ټرمپ او ځینو نورو جګپوړو چارواکو لکه مایک پمپیو، برایان هوک او جان بولټن د ترورولو هڅه وکړي.
د امریکا لوی څارنوال مریک ګارلند وویل:«د امریکا د ملي امنیت لپاره د نړۍ په ټولو هېوادونو کې ایران تر ټولو لوی ګواښ ګڼل کېږي.»