د متحده ایالاتو د ډیموکراټ ګوند له خوا د ولسمشرۍ نوماندې کمالا هرېس په پلرني کلي کې، چې د هند په سویل کې دی، خلک د سه شنبې ورځې په ټاکنو کې د هغې د بریا لپاره دعا کوي.
دغه کلی چې له واشنګټن څخه ۱۳ زره کیلومټره لرې دی، د هندوانو په معبد کې د ټاکنو په ورځ نومړې ته د دعا لپاره چمتووالی نیول شوی دی.
د هرېس نيکه پې وي ګوپالان څه باندې یوه پیړۍ وړاندې د هند په سویلي تامل ناډو ایالت کې د تولی سندراپورم په پاڼی کلي کې زیږیدلی و.
جی مانیکندن، یو کلیوال چې مندر ته نږدې یو کوچنی پلورنځی چلوي، وویل: "د سې شنبې په سهار به په مندر کې ځانګړې دعا وشي. کله چې هغه ټاکنې وګټي بیا به جشنونه ترسره شي."
په معبد کې، د هرېس نوم په یوه تیږه کې کاږل شوی، چې د هغې د نیکه سره د عامه مرستو نوملړ ښيي. بهر، یو لوی بینر په ټاکنو کې د هرېس د بریالیتوب هیله کوي.
ګوپالان او د هغه کورنۍ له دغه کلي، د تامل ناډو پلازمینې، چینای، ساحلي ښار په څو سوه کیلومترۍ کې پروت یو بل شار ته کډه شوی وو، چیرې چې هغه د خپل تقاعد تر وخته پورې د لوړ پوړي دولتي چارواکي په توګه کار وکړ.
دې کلي څلور کاله دمخه هغه وخت د نړۍ پام ځانته راواړوه، کله چې اوسیدونکو یې د ۲۰۲۰ کال په ټاکنو کې د ولسمشر د مرستیالې په توګه د هرېس له ټاکل کیدو وروسته، په ټاکنو کې د بایډن د بریا لپاره دعا وکړه او د ټاکنو د پایلو له اعلان وروسته یې دغه بریا ونمانځله.
هرېس او د هغې جمهوري غوښتونکی سیال ډونالډ ټرمپ په تاریخي ډول په دیر لږ تفاوت سره سیالۍ کوي او د لا ډیرو ملاتړو د ترلاسه کولو لپاره هڅې کوي.
ټاکل شوې چې د امریکا ټاکنې سبا، د سې شنبې په ورځ ترسره شي.