د پاکستان د کورنیو چارو وزیر محسن نقوي د شنبې په ورځ وویل، چې اسلام اباد ته نژدې په یو لاریون کې، د زنداني پخواني لومړي وزیر عمران خان له پلویانو سره په نښتو کې تر ۸۰ زیات پولیس ټپیان شوي دي.
دغه لاریون چې د خیبر پښتونخوا ایالت مشر یې مشري کوي، موخه یې په پلازمینه کې راټولیدل، په غونډو له لګول شوي بندیز څخه سرغړونه، د خان د خوشې کیدو لپاره فشار راوړل او د واکمن ایتلاف پر ضد لاریون کول دي. په پښتونخوا ایالت کې د خان ګوند په واک کې دی.
ښاغلي نقوي خبریالانو ته وویل: «د وزیر اعلی په مشرې لاریون والو، په پولیسو ډزې وکړې او په دوامداره توګه یې د قانون پلي کونکو په وړاندې اوښکې بهونکی ګاز کارول.»
هغه وویل، د جمعې له ورځې راهیسې چې له ښاره بهر د حکومت ضد لاریون په ترڅ کې نښتې پیل شوې، تر ۸۰ زیات پولیس ټپیان شوي دي.
پاکستاني چارواکو د دغې غونډې د مخنیوي لپاره د ګرځنده ټلیفونو خدمات بند کړي دي.
نقوي وویل، په داسې حال کې چې د لاریون کوونکو کاروان په درنو وسلو سمبال و، پولیسو ته لارښوونه شوې وه چې وسلې ونه ګرځوي ترڅو د وضعیت د خرابیدو مخه ونیسي. حکومت په اسلام اباد کې د امنیت د ټینګښت لپاره پوځ ځای پر ځای کړی دی.
لاریون کوونکي پلان لري چې، د ښار په سور زون کې راټول شي، چیری چې د هېواد پارلمان او بهرنیي سفارتونه شتون لري.
د عمران خان د تحریک انصاف ګوند د تاوتریخوالې تورونه ردوي، او وايي، چې غواړي سوله ییزه غونډه وکړي.
تر دې مخکې نقوي په دغه ګوند باندې غږ کړی و، چې په اسلام اباد کې د روانو ډیپلوماټیکو چارو تر ختمیدو پورې دې هر ډول غونډې وځنډوي. ټاکل شوې چې د اکتوبر په ۱۵ او ۱۶مه د شانګهای همکارۍ سازمان غونډه په دغه شار کې ترسره شي چې د چین، روسیې او هند پلاوی به پکې ګډون وکړي.
نقوي د شنبې په ورځ وویل، استخباراتي معلومات دا څرګندوي، چې لاریون کوونکي ځان ته د پام اړولو لپاره د شانګهای کنفرانس د ګډوډولو پلان لري.