د خیبرپښتنخوا له کورمې ولسوالۍ څخه ځايي سرچیني وايي، چې د دوو کلیو د اوسېدونکو ترمنځ د درې ورځنۍ جګړې په پایله کې ۱۰ ولسي وګړي وژل شوي او ۲۵ نور ټپیان دي.
دغه جګړه د کورمې ولسوالۍ د پاړه چنار په سیمه کې د سني او شیعه مذهبو ترمنځ روانه ده.
د کورمې ولسوالۍ څخه ځايي سرچینو افغانستان انټرنشنل ـ پښتو ته ویلي، چې جګړه دوه ورځې وړاندې د دوو کلیو د اوسېدونکو تر منځ چې سنيان او شیعه ګان دي پیل شوې.
په دغې روانه جګړه کې چې له درنو او سپکو وسلو کار اخیستل کیږي چې، تر دې مهاله د دواړو لوریو ۱۰ کسان وژل شوي او ۲۵ نور ټپیان دي.
ځايي خبریالانو د کرمې ولسوالۍ د پولیسو له قوله ویلي، چې له تېرو څو ورځو راهیسې د پېښور او پاړه چنار لویه لاره او د کلیو ترمنځ پر وړو لارو تګ راتګ بند شوی دی.
سرچینو ویلي، چې تېره ورځ د سني او شیعه ترمنځ د اوربند په اړه خبرې اترې هم شوې، چې پرته له کومې پایلې پای ته رسېدلې دي او حکومت هم د روانې شخړې په مهارولو کې پاتې راغلی.
له دې مخکې هم په کورمه د سنيانو او شعیه ګانو تر منځ څو ځلې خپلمنځي جګړې رامنځته شوې چې دواړو لوریو ته په کې د سر او مال زیان اوښتی دی.
د سیمې خلکو شکایت دا دی چې ځايي او مرکزي حکومت یې یوازې د جګړې ننداره کوي او د یوې مسوولې ادارې په توګه په ډزبندۍ کې رول نه لوبوي.