د بشري حقونو د څار سازمان په افغانستان کې د زیانمنونکو خلکو په تېره بیا د هزاره وګړو په خوندیتوب ټینګار وکړ.
دغه سازمان ویلي، کله چې د ۱۴۰۰ کال د زمري په میاشت کې طالبان واک ته ورسېدل تر دې مهاله داعش ډلې د هزاره وګړو پر وړاندې د ۱۷ بریدونو پړه منلې، چې له امله یې شاوخوا ۷۰۰ تنو ته په کې مرګ ژوبله اوښتې ده.
د بشري حقونو څار سازمان په دایکنډي کې د ۱۴ هزاره ټبرو وژنې ته په اشارې چې داعش ډلې یې پړه منلې ویلي، چې له ۲۰۱۵ کال راهیسې چې د داعش ډلې په افغانستان کې سر راپورته کړی، زرګونه هزاره او د نورو مذهبي لږکیو پیروانو ته مرګ ژوبله اوښتې ده.
د بشري حقونو د څار دغه سازمان وايي، په ۲۰۲۱ کال کې دوی دې پایلې ته ورسېدل چې د داعش خراسان ډلې او نورو هغو هدفي وژنو ته چې د هزاره قوم پر وړاندې کېږي باید د بشري جنایت نوم ورکړل شي.
دغه بنسټ د جمعې په ورځ (د وږي په ۱۳مه) وویل، چې د افغانستان لپاره د ملګرو ملتونو د سازمان ځانګړي راپور ورکوونکي ریچارد بنېټ هم په افغانستان کې د داعش د بریدونو په اړه د څېړنو غوښتنه کړې.
د بشري حقونو څار سازمان لیکلي:« وروستي برید ته په کتو طالبان باید ژر تر ژره په افغانستان کې د ټولو زیانمنونکو په تېره د هزاره وګړو او نورو شیعه مذهبو د خوندیتوب لپاره کوټلي ګامونه واخلي.»
دغه سازمان ټینګار کوي، هغه هېوادونه چې له طالبانو سره اړیکې لري، په کار ده چې د زیانمنونکو خلکو په څنګ کې ودرېږي او په افغانستان کې د نړۍوالو جرمونو او جنایتونو پر وړاندې د ځواب ورکولو په کار کې خپل ملاتړ په ډاګه کړي.
د بشري حقونو د څار سازمان وايي، د وژل شویو کسانو کورنۍ عدالت ته د لاسرسي په چاره کې مرستې او ملاتړ ته اړمنې دي.
دغه سازمان ویلي، د ملګرو ملتونو د بشري حقونو شورا ته په کار دي،چې د افغانو او نړۍوالو بشري حقونو له ډلو سره یو ځای په افغانستان کې د بشري حقونو د سرغړوونکو د ځواب ویلو لپاره د یوې نړۍوالې تګلارې د رامنځته کولو په کار کې هم پاملرنه وکړي.
د داعش خراسان څانګې د پنجشنبې په ورځ (د وږي په ۲۲مه) په یوه بیان کې وویل، چې په دایکنډي کې یې ۱۵ ولسي خلک وژلي دي.
داعش ډلې د طالبانو له واکمنېدو څو میاشتې وروسته ګواښ وکړ، چې شیعه مذهبه وګړي به «له بغداده تر خراسانه» په نښه کوي او وژني به یې.