د پاکستان لومړی وزیر شهباز شریف وايي، چې د پېسو له نړۍوال صندوق څخه بیا پور اخیستل یې مجبوري وه او پورونو د پاکستان راتلونکي نسلونه هم ګرو کړي دي.
نوموړي دغه خبرې نن دوشنبه بلوچستان ته د خپل سفر پر مهال کړي او زیاته کړې یې ده، چې دوی درې کاله وخت لري او باید درې کاله وروسته مجبور نه شي، چې یو ځل بیا له ای اېم ایف څخه پور وغواړي.
ښاغلي شریف وویل: "که درې کاله وروسته یو ځل بیا موږ مجبور شو، چې ای اېم ایف ته د پور لپاره ورشو بیا خو زموږ لپاره مرګ پکار دی".
نوموړي د پاکستان پر ټولو ادارو غږ کړی، چې په راتلونکې یوې میاشتې کې باید د پېسو د نړۍوال صندوق شرایط پوره کړي.
هغه زیاته کړې: "که سختې پرېکړې ونه کړو نو یو ځل بیا به د ای اېم ایف پور ته مجبوریږو".
پاکستان تازه یو ځل بیا له ای اېم ایف څخه پور تر لاسه کړی او د دغه پور له مخې د پاکستان حکومت مجبور دی، چې د مالیې، برېښنا، ګازو او یو خوراکي توکو په بیو کې لوړوالی لري.
بل خوا د شهباز شریف د حکومت اپوزسیون پر حکومت نیوکې کړي، چې د پاکستان بودیجه یې د ای اېم ایف په خوښه جوړه کړې او یو شمېر کړۍ نه غواړي، چې د پاکستان اقتصاد پر پښو ودریږي.
تېر کال د پاکستان د تحریک انصاف ګوند مشر عمران خان له زندان څخه ای اېم ایف ته یو لیک لېږلی و، چې پکې یې د پېسو له نړۍوال صندوق څخه غوښتي وو، چې د شهباز شریف حکومت ته پور ور نه کړي.