د اسټرالیا لوبډلې ته له ماتې ورکولو وروسته، محمد اشرف غني، حامد کرزي، عبدالله عبدالله، امرالله صالح، د کرېکټ نړېوالو پوهانو او میلیونونو د کرېکټ مینوالو د افغان لوبډلې ستاینه کړې خو طالب چارواکي تر اوسه پورې غلي دي.
نن یکشبې د (چنګاښ درېیمه) د افغانستان کرېکټ ملي لوبډلې د نړېوال جام د اته غوره پړاو سیالیو کې د اسټرالیا د کرېکټ ملي لوبډلې ته د ۲۱ منډو په توپیر ماتې ورکړه.
د افغان لوبډلې دغه بری د نړۍ په هره برخه کې د کرېکټ د مینوالو او پوهانو له لوري وستایل شو.
مخکیني ولسمشر محمد اشرف غني د دغه بري په اړه لوبغاړو ته مبارکي ویلي، او د شل اوریزو نړېوالو لوبو اتلې لوبډلې اسټرالیا ته د افغان لوبډلې له لوري ماتې ورکول یې د کرېکټ تاریخي شېبه یاده کړې ده.
پخواني ولسمشر حامد کرزي پره خپله اېکس پاڼه لیکلي: «د خوښۍ خبره ده چې د اسټرالیا په وړاندې د کرېکټ ملي لوبډلې بریا خپله کړه او خپل ولس یې خوښ کړ.»
همدارنګه په تېر حکومت کې د ملي پخلاینې عالي شورا مشر عبدالله عبدالله د اسټرالیا په وړاندې د افغانستان د کرېکټ ملي لوبډلې بری ستایلی او دغه بری یې د افغانستان لپاره تاریخي ګڼلی.
د مخکیني ولسمشر ډاکتر اشرف غني لومړی مرستیال او د زرغون بهیر مشر امرالله صالح د اسټرالیا په وړاندې د افغان ملي لوبډلې د بري مبارکي ویلې، او په خپله اېکس پاڼه یې لیلکي: « د افغانستان د کرېکټ ملي لوبډلې بریا مو مبارک شه، زه د خوست له خلکو څخه هم مننه کوم چې د بریا د نمانځلو پرمهال یې د طالبانو بیرغ رد کړی.»
د دې تر څنګ د نړۍ غوره کرېکټ پوهانو او د بېلابېلو هېوادونو د کرېکټ پخوانیو لوبغاړو، محمد کیف، اشوین، ټام موډي، مایکل واګون، ډینیش کارټیک، وسیم جعفر او مفومیلو د اسټرالیا په وړاندې د افغان لوبډلې بری ستایلی او افغان لوبډله یې د شل اوریزو سیالیو غوره لوبډله بللې ده.
خو طالب چارواکو د تل په څېر یو ځل بیا د افغانستان د کرېکټ ملي لوبډلې د دغه تاریخي بري په اړه هیڅ پیغام نه دی خپور کړی.
افغان لوبډلې د ۲۰۲۴ کال شل اوریز نړېوال جام سیالیو کې تردې مهاله شپږ لوبې تر سره کړې چې څلور یې ګټلې او دوه یې بایللې دي.
افغان لوبډله په داسې حال کې د اسټرالیا لوبډلې ته ماتې ورکوي چې پر افغانستان د طالبانو له واکمنېدو وروسته د اسټرالیا کرېکټ بورډ له افغان لوبډلې سره په افغانستان کې د ښځو د حقونو تر پښو لاندې کولو په غبرکون کې رسمي لوبې لغوه اعلان کړې.