د پښتو ډرامو لوبغاړې خوشبو مړی د پښتونخوا په نوښار کې د کروندو په منځ کې موندل شوی دی.
پاکستاني رسنۍ وايي، چې د نوموړې د وژل کېدو علت او دا چې د چا له لورې وژل شوې تر اوسه روښانه نه ده.
د نوښار پولیس وایي، چې د خوشبو مړی تر هغه وروسته د نوښار په خوشحال مقام سیمه کې په یوې کرونده کې وموندل شو، چې دوی ته د یوه جسد د پېدا کېدو خبر ورکړل شو.
د خوشبو ورور شهریار د نوموړې د وژل کېدو په تور د دوو کسانو په ضد قضیه ثبت کړې او ویلي یې دي، چې یادو کسانو خوشبو ته په کنسرټونو کې د ګډون او نڅا کولو په اړه خبرداری ورکړی و.
پولیس وایي، چې د یادې اداکارې مړی روغتون ته لېږدول شوی او د پېښې په اړه هم پلټنې روانې دي.
پولیس هڅه کوي، د پېښې عاملین ونیسي.
پاکستان له هغو هېوادونو څخه دی، چې افراطي ډلې پکې زیاتې دي او ډېر کله ښځې په ځانګړې توګه ښځینه سندرغاړې، نڅاګرې او فعالینې پکې په مرموز ډول وژل کیږي.