په کراچۍ کې د طالبانو قونسل د جمعې په ورځ د ښځو او ماشومانو په ګډون د ۲۳ افغان بندیانو د خوشې کولو خبر ورکړ او زیاته یې کړه، چې دغه خوشې شوي بندیان یې افغانستان ته لېږدولي دي.
د عبدالجبار تخاري په وینا، تر دې مهاله له څلورو زرو زیات افغان بندیان د پاکستان له زندانونو خوشې شوي او افغانستان ته ستانه کړل شوي دي.
په کراچۍ کې دغه طالب چارواکي د جمعې په ورځ د (غبرګولي په ۴مه) په یوه ویډیويي پیغام کې ویلي، چې تر اوسه د ښځو او ماشومانو په ګډون ۴۲۲۸ تنه د پاکستان د بېلابېلو صوبو له زندانونو خوشې شوي او افغانستان ته لېږل شوي دي.
هغه دا رنګه ویلي، چې دمګړۍ ۴۹ تنه نور افغانان د سند په زندانونو کې بندیان دي او د هغوی د خوشې کولو لپاره هم هڅې روانې دي.
تخاري دا رنګه افغان کډوالو ته د پاکستان د ورکړل شوي مهلت یادونه هم وکړه، چې د جون میاشتې تر پایه به له دغه هېواده اېستل کېږي.
د طالبانو قونسل هیله ښکاره کړه، چې پاکستاني چارواکي به د افغان کډوالو لپاره ورکړل شوې موده نوره هم وغځوي.
د پاکستان حکومت له دې وړاندې ویلي و، چې د (پي او ار) کارټونو لرونکي کډوال به د جون تر پایه له دغه هېواده باسي.
د پاکستاني رسنیو لهخوا د ورکړل شویو شمېرو له مخې، له تېرې نومبر میاشتې را په دې خوا له نیم مېلیون څخه ډېر افغان کډوال له پاکستانه اېستل شوي دي.
دغو رسنیو داسې اټکل هم کړی، چې د افغان کډوالو د اېستلو په دویم پړاو کې به شاوخوا یو مېلیون نور افغانان هم له دغه هېواده واېستل شي.