د عزیزي ګروپ مشر میرویس عزیزي اعلان وکړ چې افغانستان ته له پاکستان څخه افغان کډوالو او پناه غوښتونکو ته د رسیدنې لپاره ۳۰۰ میلیونه افغانۍ مرسته کوي.
عزیزي د جمعې په ورځ «د لړم په ۱۹مه» پر خپل اېکس لیکلي، له پاکستان څخه د افغان کډوالو جبري ایستلو بشري ناورین سخت اندیښمن کړی.
هغه زیاته کړې، چې دې مرسته کې به د کډوالو لپاره ګرم خواړه، د ژمي البسه یا اغوستوکي او نور اړین ضروریات شامل وي.
د عزیزي په وینا سبا ته به د دوی ټیمونه تورخم او سپین بولدک ته د اړتیاوو د کچې د تثبیت لپاره ولاړ شي. تر څنګ به یې له مربوطه چارواکو سره په همغږۍ د دغو مرستو د رسولو لړۍ پیل کړي.
یوه میاشت او لس ورځې کیږي چې له پاکستان څخه د افغان کډوالو جبري ایستل لړۍ پیل شوې ده.
تر اوسه د طالب چارواکو د راستانه شویو کډوالو کره شمېره نه دی خپور کړی خو، په تېره یوه میاشت کې نږدې دوه لکه ۱۵ زره افغان کډوال په جبري توګه د پاکستان له بېلابېلو برخو افغانستان ته ستانه شوي دي.