د امریکا ولسمشر ډونالډ ټرمپ د اسراییل لومړي وزیر بنیامین نتنیاهو ته بلنه ورکړه، چې د فېبرورۍ په څلورمه واشنګتن ته سفر وکړي.
نتنیاهو د ټرمپ په دویمه دوره کې لومړنی بهرنی مېلمه دی، چې سپنې ماڼۍ ته بلل کېږي.
دغه بلنه دا په ډاکه کوي، چې نتنیاهو د جمهوریت غوښتونکو لپاره څومره اهمیت لري.
ټرمپ وویل، چې د اسراییل له لومړي وزیر سره به یې د خبرو محور په اسراییل او ګاونډیو هېوادونو کې د سولې پر ټینګښت او همدا راز له ګډو دوښمنانو سره پر مبارزې وي.
د نتنیاهو دفتر هم په یوې بیانیه کې تایید کړه، چې دا کتنه د دواړو هېوادونو د اړیکو د پیاوړتیا د هڅو په چوکاټ کې پلان شوې ده.
امریکايي چارواکو چې نه یې غوښتل نومونه یې واخیستل شي وویل، د نتنیاهو او ټرمپ ترمنځ د لیدنې جزییات به په روانه اونۍ کې اسراییل ته د منځني ختیځ لپاره د ټرمپ د ځانګړي استازي سټیو ویټکاف د سفر پر مهال نهايي شي.
ویټکاف د یکشنبې په ورځ د سلواغې په اوومه په نیویارک کې د یوې کنیسه د پرانېستلو پروګرام پر مهال وویل،چې هغه به د چهارشنبې په ورځ د سلواغې لسمه اسراییل ته سفر وکړي او د اسراییل او حماس تر منځ د اوربند د موافقې د دوام او پر عملي کولو خپلو هڅو ته دوام ورکړي.
د ټرمپ او نتنیاهو تر منځ دا لیدنه یوه میاشت وروسته له هغې کېږي، چې اسراییل له حماس سره په غزه کې د خپلې ۱۵میاشتنۍ جګړې د پای ته رسولو په بدل کې د فلسطیني وسله والې ډلې له خوا د یرغمل شویو ۳۳ اسراییلیانو د خوشې کولو په بدل کې موافقه وکړه.
د دې موافقې له مخې به د اسراییل له زندانونو لسګونه فلسطیني بندیان خوشې شي.