د پاکستان لومړي وزیر د اپیکس کمېټې غونډې ته د وینا پرمهال ویلي، چې «د پولې ها غاړې بریدونو ته یې غاښ ماتی ځواب ور کړ او بیا به یې هم ور کړي.»
شهباز شریف افغانستان ته اشاره نه ده کړې، خو د ټي ټي پي پر مرکزونو د برید په پلمه یې نږدې لس ورځې مخکې پکتیکا او خوست کې بمبار وکړ.
د پاکستان د دولتي راډیو د راپور له مخې، د پاکستان لومړي وزیر د “ملي عمل” پلان عملي کولو لپاره د اپیکس کمېټې غونډې ته د وینا پر مهال دا هم ویلي، چې د “فتنې الخوارج ترهګرو” د له منځه وړلو وخت رارسېدلی دی.
شهباز شریف زیاته کړي ده:«د سر حد هغې غاړې اقدامونو ته مو غاښ ماتوونکی ځواب ورکړی او ورکوو به یې، د دښمنانو ملاتړي په پاکستان کې موجود دي. د دښمنانو ملاتړ کوونکي پاکستان ته د زیان رسولو په دسیسو بوخت دي.»
په افغانستان کې د طالبانو واکمنېدو او پاکستان په تېره پښتونخوا کې د تاوتریخوالي زیاتېدو پسې اسلام اباد د طالبانو حکومت د دغه هېواد ضد وسلوالو ته د پټنځیو پر ور کولو تورنوي.
دوی وايي، چې وسلوال په تېره ټي ټي پي چې پاکستان یې «فتنه الخوارج بولي» له ډیورنډ کرښې په ور اوښتو پاکستان په تېره پښتونخوا کې بریدونه کوي.
د پاکستان پوځ نږدې لس ورځې مخکې په پکتیکا او خوست کې د تحریک طالبان پاکستان د مرکزونو په نښه کولو په پلمه بریدونه وکړ.
خو پر طالب چارواکو سربېره یوناما او خپلواکې رسنۍ وايي چې دې بریدونو کې تر ډېر ه ماشومان او ښځې وژل شوې دي.
افغان طالبانو له هغه بریدونو په ځواب کې پر ډیورنډ کرښه د پاکستان پر سرحدي پوستو بریدونه وکړل.
خو د افغان طالبانو او پاکستان ترمنځ دغه ترینګلتیا لا هم پای ته نه ده رسیدلې او د راپورونو له مخې، چې تېره شپه یوځل بیا په خوست کې د دواړو لوریو ترمنځ جګړه شوې ده.