د طالبانو ددفاع وزارت وايي، چې د یاد وزارت سرپرست وزیر مولوي محمد یعقوب مجاهد د روسیې له جګپوړي پلاوي سره لیدنه کې له تور نوملړه د طالبانو د نوم پر اېستلو خبرې کړې دي. دغه روسي پلاوي نن کابل ته سفر کړی دی.
د طالبانو دفاع وزارت د دوشنبې په ورځ د لیندۍ پر پنځمه وویل چې مولوي یعقوب روسي پلاوي ته د ښه راغلاست ترڅنګ له یاد پلاوي غوښتنه کړې، چې د «اسلامي امارت» نوم له تور نوملړه وباسي.
ددغه پلاوي په ترکیب کې، چې مشري یې د روسیې د امنیت شورا سرمنشي سرګي شویګو کوي، د ياد هېواد د لومړي وزیر مرستیال الکسي اویرچوک، د افغانستان لپاره د روسیې د ولسمشر ځانګړی استازی ضمیر کابلوف، په افغانستان کې د روسیې سفیر دمیتري ژیرنوف او نور روسي چارواکي شامل دي.
د طالبانو دفاع وزارت وايي، چې مولوي یعقوب د کابل او مسکو ترمنځ د دوه اړخیزو اړیکو د ټینګښت په برخه کې د روسیې د هڅو ستاینه کړې ده.
طالبان وايي، روسي پلاوي هم د افغانستان د امنیت او ثبات ټینګښت په برخه کې د دې ډلې د دفاع وزارت هڅې ستایلې دي.
یاد پلاوي په ورته وخت کې د طالبانو له نورو جګپوړو چارواکو سره هم لیدنې کتنې کړې دي.
دا لومړی ځل دی چې د روسیې یو جګپوړی دولتي پلاوی له طالبانو سره په کابل کې ګوري.
یاد پلاوي یادونه کړې چې دوی هڅه کوي په شانګهای سازمان کې د افغانستان د څارونکي غړي رول بېرته فعال کړي.