د امریکا نوي منتخب ولسمشر ډونالډ ټرمپ په دغه هېواد کې د بې‌اسناده کډوالو د جبري اېستلو له امله د ملي بېړني حالت د اعلانولو لپاره چمتووالی ښودلی دی.

په یوه بیان کې ډونالډ ټرمپ ویلي، چې هغه به د امریکا په تاریخ کې په لوی شمېر د بې‌اسناده خلکو د شړلو لپاره ټولې پوځي اسانتیاوې وکاروي.
ډونالډ ټرمپ د ټاکنیز کمپاین پر مهال په وار، وار ویلي و، چې ټول بې‌اسناده کډوال به له دغه هېواده وباسي.
هغه دا هم په ډاګه کړې وه، چې تر ټولو مخکې به هغه بې‌اسناده کډوال اېستل کېږي چې په جرمونو کې ښکېل وي.
دغو څرګندونو په متحده ایالتو کې د بشري حقونو د مدافعینو نیوکې هم راپارولې دي.
د امریکا د کډوالۍ شورا یوه جګپوړي غړي ارون رېچلن مېلنېک ویلي، د متحده ایالاتو د قانون له مخې ولسمشران کولای شي ملي بېړنی حالت اعلان کړي او یوازې په ځانګړو حالاتو کې بېړني واکونه پلي کړي.
نوموړي زیاته کړې:« د کډوالو د اېستنې لپاره د پوځي ځواک کارول په ځانګړو حالاتو کې نه شي راتلای.»