صالح محمد ګڼو هېوادونو ته په ماتې ورکولو سره د قطر په پلازمېنه دوحه کې خپل ټایلنډي سیال ته ۳ پر ۴ پایلوبه بایلوده او په یادو نړۍوالو سیالیو کې یې دویم مقام ترلاسه کړ.
د طالبانو تر واک لاندې د المپیک، بدني روزنې او سپورټ ادارې د یکشنبې په ورځ د (لړم ۲۰مه) په اېکس پاڼه لیکلي، چې د افغانستان د سنوکر ملي لوبغاړي صالح محمد د سنوکر په نړۍوالو سیالیو کې دویم مقام تر لاسه کړ.
دغه اداره وايي، ښاغلي صالح محمد د فلسطین، اردن، عراق د سنوکر لوبغاړو ته په یو یو ځل ماتې او د هندوستان او ویلز لوبغاړو ته په دوه دوه ځله ماتې ورکولو سره د قطر په پلازمېنه دوحه کې د سونکر د نړۍوالو سیالیو پای لوبې ته لاره وموندله.
د المپیک ادارې د معلوماتو له مخې د سنوکر لوبې افغان لوبغاړی صالح محمد په پایلوبه کې د ټایلنډ هېواد له لوبغاړي سره مخ شو، خو پایلوبه ټایلنډي لوبغاړي څلور پر درې صالح محمد ته ماتې ورکړه او صالح محمد په یادو سیالیو کې د لویو په برخه کې دویم مقام تر لاسه کړ.
د سنوکر نړۍوالي لوبې د اکټوبر میاشتې په ۲۸مه نېټه په دوحه پیل شوې وې او د نومبر میاشتې تر نهمې نېټې یې دوام درلود.
د سنوکر په دغو نړۍوالو سیالیو کې د ۳۱ هېوادونو څخه ۶۴ لوبغاړو ګډون کړی وو.
په دغو سیالیو کې د افغانستان په استازیتوب څلور لوبغاړو ګډون درلود.